متحدہ عرب امارات میں ہونے والی شدید بارشوں نے مختلف ریاستوں میں سیلابی صورتحال پیدا کر دی ہے، جس کے باعث معمولاتِ زندگی بری طرح متاثر ہوئے ہیں۔ متحدہ عرب امارات کے بڑے شہروں دبئی، ابوظبی، عجمان اور راس الخیمہ میں کئی علاقوں میں سڑکیں تالاب کا منظر پیش کرنے لگیں۔
شارجہ میں موسلا دھار بارش اور ژالہ باری کے باعث سڑکیں ندی نالوں میں تبدیل ہو گئیں، جبکہ نشیبی علاقوں میں پانی جمع ہونے سے شہریوں کو شدید مشکلات کا سامنا کرنا پڑا۔ متعدد گاڑیاں پانی میں پھنس گئیں اور شہریوں کو آمد و رفت میں دشواری پیش آئی۔دوسری جانب ابوظبی کے مرکزی علاقوں میں بھی بارش کا پانی جمع ہو گیا، جس کے باعث ٹریفک کا نظام شدید متاثر ہوا اور کئی سڑکوں پر گاڑیوں کی لمبی قطاریں دیکھنے میں آئیں۔دبئی میں صورت حال مزید سنگین دکھائی دی جہاں ائیرپورٹ اور اہم شاہراہوں پر پانی کھڑا ہو گیا۔ حکام نے مسافروں کو ہدایت جاری کی ہے کہ وہ اپنی پرواز سے کم از کم تین گھنٹے قبل ائیرپورٹ پہنچیں۔ تاہم شیخ زاید روڈ اور ابوظبی جانے والی بڑی شاہراہیں ٹریفک کے لیے کھلی رکھی گئی ہیں۔
محکمہ موسمیات نے آئندہ دنوں میں مزید بارشوں کی پیشگوئی کرتے ہوئے خبردار کیا ہے کہ شہری احتیاطی تدابیر اختیار کریں، جبکہ ہفتہ سے موسم بہتر ہونے کی امید ظاہر کی جا رہی ہے۔ادھر امارات کے محکمۂ اوقاف نے غیر معمولی موسمی صورتحال کے پیش نظر شہریوں کو ہدایت دی ہے کہ وہ نمازیں گھروں میں ادا کریں تاکہ کسی بھی ممکنہ خطرے سے بچا جا سکے۔