ویڈیو شیئرنگ پلیٹ فارم یوٹیوب نے ایرانی حکومت کے حامی ایک چینل کو معطل کردیا ہے، جو لیگو اسٹائل مصنوعی ذہانت (اے آئی) ویڈیوز کے ذریعے امریکی صدر ڈونلڈ ٹرمپ کا مذاق اڑانے کی وجہ سے خاصی شہرت حاصل کرچکا تھا۔
رپورٹس کے مطابق مذکورہ چینل پر ایسی ویڈیوز اپ لوڈ کی جاتی تھیں جن میں ٹرمپ کو مختلف طنزیہ اور فرضی حالات میں دکھایا جاتا تھا۔ ان ویڈیوز میں جنگی مناظر، عالمی رہنماؤں کے کردار اور سیاسی واقعات کو لیگو اینیمیشن انداز میں پیش کیا جاتا تھا، جس نے سوشل میڈیا صارفین کی بڑی توجہ حاصل کی۔یوٹیوب انتظامیہ کا کہنا ہے کہ چینل نے پلیٹ فارم کی اسپام اور دھوکا دہی سے متعلق پالیسیوں کی خلاف ورزی کی، جس کے باعث اسے معطل کیا گیا۔ کمپنی کے مطابق ایسے مواد کے خلاف کارروائی کی جاتی ہے جو صارفین کو گمراہ کرے یا پلیٹ فارم کے قواعد سے متصادم ہو۔
دوسری جانب چینل انتظامیہ نے یوٹیوب کے فیصلے کو سنسرشپ قرار دیتے ہوئے کہا ہے کہ ان کے مواد کو سیاسی بنیادوں پر نشانہ بنایا گیا۔ ان کا مؤقف ہے کہ طنز و مزاح اور سیاسی تنقید اظہارِ رائے کا حصہ ہیں، جنہیں دبانے کی کوشش کی جارہی ہے۔یاد رہے کہ اس چینل کی ویڈیوز لاکھوں بار دیکھی جا چکی ہیں اور متعدد کلپس مختلف سوشل میڈیا پلیٹ فارمز پر تیزی سے وائرل ہوئے تھے۔