وزیراعلیٰ پنجاب مریم نواز نے کہا ہے کہ پنجاب میں ماڈل ولیج پروگرام کے تحت دو ہزار دیہات کو جدید سہولتوں سے آراستہ کیا جا رہا ہے جبکہ رابطوں میں بہتری کیلئے شاہراہوں اور بنیادی ڈھانچے کو بھی ترقی دی جا رہی ہے۔
آذربائیجان کے دارالحکومت باکو میں ورلڈ اربن فورم سے خطاب کرتے ہوئے مریم نواز کا کہنا تھا کہ پنجاب حکومت شہری اور دیہی ترقی پر خصوصی توجہ دے رہی ہے تاکہ عوام کو بہتر سہولیات فراہم کی جا سکیں۔
انہوں نے کہا کہ “ستھرا پنجاب” میگا پروجیکٹ کے تحت صفائی کا جامع نظام تشکیل دیا گیا ہے جبکہ لاہور کو شنگھائی تعاون تنظیم کی جانب سے اہم ثقافتی شہر قرار دیا جانا خوش آئند پیش رفت ہے۔
وزیراعلیٰ پنجاب نے کہا کہ حکومت سیاحت کے فروغ پر بھی بھرپور توجہ مرکوز کیے ہوئے ہے تاکہ تاریخی اور ثقافتی مقامات کو عالمی سطح پر متعارف کرایا جا سکے۔
مریم نواز نے آذربائیجان کی قیادت کی مہمان نوازی کو سراہتے ہوئے کہا کہ صدر الہام علیئیف کی قیادت میں آذربائیجان کی ترقی قابلِ تحسین ہے اور وہ پاکستان کے عوام کی جانب سے محبت اور خیرسگالی کا پیغام لے کر آئی ہیں۔
انہوں نے کہا کہ ورلڈ اربن فورم میں شرکت ان کیلئے خوشی کا باعث ہے جہاں دنیا بھر کے رہنما پائیدار اور جدید شہری ترقی پر تبادلہ خیال کر رہے ہیں۔
فورم کی سائیڈ لائنز پر وزیراعلیٰ پنجاب کی بلغاریہ، کرغزستان، ازبکستان اور جارجیا کے رہنماؤں سے بھی ملاقاتیں ہوئیں جن میں عوام دوست اور پائیدار ترقی کے مشترکہ عزم کا اظہار کیا گیا۔
پنجاب کے 2 ہزار دیہات کو جدید سہولتیں فراہم کی جا رہی ہیں، مریم نواز
