جمعیت علمائے اسلام کے سربراہ مولانا فضل الرحمان نے ملک میں بڑھتی ہوئی مہنگائی، بدامنی اور دہشت گردی کے واقعات کے خلاف کل ملک بھر میں احتجاجی مظاہروں کا اعلان کر دیا ہے۔
جے یو آئی کی جانب سے جاری مرکزی اعلامیے کے مطابق جمعہ کے روز تمام صوبائی دارالحکومتوں اور ضلعی ہیڈ کوارٹرز میں بڑے احتجاجی مظاہرے کیے جائیں گے۔ جماعت نے احتجاجی تیاریوں کو حتمی شکل دے دی ہے اور کارکنوں کو بھرپور شرکت کی ہدایت جاری کر دی گئی ہے۔
ترجمان جے یو آئی کے مطابق مولانا فضل الرحمان کی خصوصی اپیل پر عوامی احتجاج کا فیصلہ کیا گیا، جس کا مقصد حکومت کی معاشی اور سیکیورٹی پالیسیوں کے خلاف آواز بلند کرنا ہے۔
اعلامیے میں کہا گیا کہ ملک میں بدامنی، دہشت گردی اور مسلسل بڑھتی مہنگائی نے عوام کی زندگی اجیرن بنا دی ہے۔ ترجمان کے مطابق غریب اور متوسط طبقہ شدید معاشی مشکلات کا شکار ہے جبکہ روزمرہ اشیائے ضروریہ کی قیمتوں میں بے قابو اضافے نے عوام کو پریشانی میں مبتلا کر دیا ہے۔
جے یو آئی نے عوام سے اپیل کی ہے کہ وہ اپنے حقوق کے تحفظ اور مہنگائی کے خلاف آواز بلند کرنے کے لیے احتجاجی مظاہروں میں بھرپور شرکت کریں۔ جماعت کا کہنا ہے کہ موجودہ حالات میں عوام کو ریلیف فراہم کرنے کے بجائے حکومت مکمل طور پر ناکام دکھائی دے رہی ہے۔
مولانا فضل الرحمان نے ملک میں امن و امان کی خراب صورتحال پر بھی تشویش ظاہر کرتے ہوئے کہا کہ دہشت گردی کے بڑھتے واقعات نے شہریوں میں خوف پیدا کر دیا ہے جبکہ عوام خود کو غیر محفوظ محسوس کر رہے ہیں۔
مولانا فضل الرحمان کا مہنگائی اور بدامنی کے خلاف ملک گیر احتجاج کا اعلان
