چین،شانشی میں کوئلے کی کان میں ہونے والے خوفناک گیس دھماکے کے نتیجے میں کم از کم 90 مزدور ہلاک جبکہ متعدد افراد تاحال لاپتہ ہیں۔
چینی حکام کے مطابق حادثہ گزشتہ شام اُس وقت پیش آیا جب کان کے اندر مجموعی طور پر 247 کارکن موجود تھے، جس کے باعث کان میں افراتفری پھیل گئی اور امدادی اداروں کو فوری طور پر طلب کر لیا گیا۔چینی سرکاری میڈیا کے مطابق حادثے کے بعد بڑی تعداد میں مزدوروں کو بحفاظت کان سے باہر نکال لیا گیا، تاہم کئی کارکن زہریلی کاربن مونو آکسائیڈ گیس سے شدید متاثر ہوئے۔ ریسکیو ٹیمیں مسلسل امدادی سرگرمیوں میں مصروف ہیں جبکہ لاپتہ مزدوروں کی تلاش کے لیے خصوصی آلات اور ماہر ٹیموں کی مدد لی جا رہی ہے۔حادثے کے بعد چینی صدر شی جن پنگ نے زخمیوں کو فوری اور بہترین طبی سہولیات فراہم کرنے کی ہدایت دیتے ہوئے واقعے کی مکمل اور شفاف تحقیقات کا حکم دے دیا ہے۔ حکام نے ابتدائی تحقیقات کے بعد کان کمپنی کے ایک ذمہ دار اہلکار کو تحویل میں بھی لے لیا ہے۔
حکام کا کہنا ہے کہ حادثے کی وجوہات جاننے کے لیے مختلف پہلوؤں کا جائزہ لیا جا رہا ہے، جن میں حفاظتی اقدامات، گیس کے اخراج اور کان کے اندر وینٹیلیشن سسٹم کی کارکردگی شامل ہے۔واضح رہے کہ شانشی چین میں کوئلے کی پیداوار کا اہم مرکز سمجھا جاتا ہے، تاہم ماضی میں بھی یہاں حفاظتی انتظامات کی کمی اور صنعتی غفلت کے باعث کئی بڑے حادثات رونما ہو چکے ہیں، جن میں درجنوں مزدور جان کی بازی ہار چکے ہیں