وفاقی دارالحکومت اسلام آباد میں جناح ایونیو پر پریڈ گراؤنڈ کے قریب پیش آنے والے افسوسناک ٹریفک حادثے میں ایک خاتون جاں بحق ہو گئی ہیں۔
پولیس کے مطابق حادثہ اس وقت پیش آیا جب ایک تیز رفتار کار بے قابو ہو کر فٹ پاتھ پر چڑھ گئی۔ حادثے کے نتیجے میں گاڑی چلانے والی خاتون موقع پر ہی دم توڑ گئیں۔پولیس حکام نے بتایا کہ جاں بحق خاتون کی شناخت ریان وزیر کے نام سے ہوئی ہے۔ ذرائع کے مطابق ریان وزیر سابق سفیر ایاز وزیر کی بیٹی تھیں۔عینی شاہدین کے مطابق حادثہ پریڈ گراؤنڈ میٹرو اسٹیشن کے قریب پیش آیا جہاں گاڑی تیز رفتاری کے باعث اپنا توازن برقرار نہ رکھ سکی۔ حادثے کے بعد پولیس اور امدادی ٹیمیں فوری طور پر موقع پر پہنچ گئیں جبکہ لاش کو اسپتال منتقل کر دیا گیا۔
پولیس نے واقعے کی تحقیقات شروع کر دی ہیں جبکہ ابتدائی اطلاعات کے مطابق حادثے کی ممکنہ وجہ تیز رفتاری بتائی جا رہی ہے۔