پشاور میں پاکستان ریلویز کی جانب سے اپ گریڈڈ عوام ایکسپریس کا افتتاح ایک سادہ مگر باوقار تقریب کے دوران پشاور ریلوے اسٹیشن پر کر دیا گیا۔
افتتاحی تقریب سیکریٹری ریلویزسید مظہرعلی شاہ نے وفاقی وزیر برائے ریلویز محمد حنیف عباسی کی خصوصی ہدایات پر انجام دی، جبکہ قومی کرکٹ ٹیم کے سابق کپتان شاہد آفریدی بھی اس موقع پر ان کے ہمراہ موجود تھےتقریب کے دوران سیکرٹری ریلویز اور شاہد آفریدی نے اپ گریڈڈ ٹرین میں فراہم کی گئی جدید سہولیات کا تفصیلی جائزہ لیا۔
25 مئی 2026 کو پشاور کینٹ سے پہلی اپ گریڈڈ ٹرین کراچی کے لیے روانہ کی گئی افتتاحی ٹرین صبح 8:30 بجے پشاور سے روانہ ہوئی یہ ٹرین پشاور سے براستہ راولپنڈی، لاہور، خانیوال ،ملتان ،بہاولپور، خان پور، لیاقت پور، رحیم یار خان، صادق اباد، ڈہرکی، پنوں عاقل، روہڑی، نواب شاہ، ٹنڈو آدم، حیرد آباد سے ہوتے ہوئے کراچی پہنچے گی،اس ٹرین میں مکمل نئے ریکس لگائے گئے ہیں تاکہ کم سے کم وقت میں مسافر اپنے سفر کو آرام دہ انداز میں طے کر سکیں۔
عوام ایکسپریس کو جدید تقاضوں سے ہم آہنگ کرتے ہوئے اس میں آن بورڈ وائی فائی، آرام دہ نشستیں، بہتر سفری ماحول اور دیگر معیاری سہولیات فراہم کی گئی ہیں تاکہ مسافروں کو محفوظ، پرسکون اور خوشگوار سفر میسر آ سکے جدید سہولیات سے لیس عوام ایکپریس میں 8 ائیر کنڈشینڈ بوگیاں ہیں جس میں 1234 مسافر سفر کرسکیں گے-
اس موقع پر شاہد آفریدی نے پشاور ریلوے اسٹیشن پر جدید ٹھنڈے پانی کے فلٹریشن پلانٹ کا بھی افتتاح کیا، جس سے روزانہ سفر کرنے والے مسافروں کو صاف اور ٹھنڈے پانی کی بہتر سہولت دستیاب ہوگی۔
میڈیا سے گفتگو کرتے ہوئے سیکرٹری ریلویز نے کہا کہ اپ گریڈڈ عوام ایکسپریس پشاور کے عوام کے لیے پاکستان ریلویز کی جانب سے عید کا تحفہ ہے وفاقی وزیر ریلویز محمد حنیف عباسی کی ہدایت پر افتتاحی تقریب کو سادگی کے ساتھ مختصر رکھا گیاسیکرٹری ریلویز نے اس عزم کا اعادہ کیا کہ پاکستان ریلویز ملک بھر میں مسافروں کو جدید، محفوظ اور معیاری سفری سہولیات فراہم کرنے کے لیے اپنی اصلاحاتی اور ترقیاتی کوششیں جاری رکھے گی۔
سابق قومی کرکٹر شاہد آفردی نے تقریب سے اپنے خطاب میں کہا کہ کوئٹہ کے واقعے پر افسوس ہوا، اللہ پاک شہداء کے درجات بلند فرمائے، پاکستان ریلوے کو نئی ٹرین کے آغاز پر مبارکباد دیتا ہوں، کینٹ اسٹیشن پر شاہد آفریدی فاؤنڈیشن کی جانب سے واٹر فلٹریشن پلانٹ لگایا گیا ہے۔