وفاقی دارالحکومت اسلام آباد کے سیکٹر آئی ٹین میں واقع ایک گھر میں گیس سلنڈر دھماکے کے نتیجے میں 2 افراد جاں بحق جبکہ 3 زخمی ہو گئے۔
افسوسناک واقعے کے بعد علاقے میں خوف و ہراس پھیل گیا جبکہ ریسکیو اور فائر بریگیڈ کی ٹیمیں فوری طور پر موقع پر پہنچ گئیں۔ریسکیو حکام کے مطابق گھر کے فرسٹ فلور پر قائم کچن میں گیس لیکیج کے باعث سلنڈر زور دار دھماکے سے پھٹ گیا جس کے نتیجے میں آگ بھڑک اٹھی۔ دھماکے اور آگ لگنے سے مجموعی طور پر 5 افراد جھلس کر زخمی ہوئے جنہیں فوری طبی امداد کے لیے اسپتال منتقل کیا گیا۔حکام کا کہنا ہے کہ زخمیوں میں سے 2 افراد دورانِ علاج دم توڑ گئے جبکہ دیگر 3 زخمیوں کو طبی سہولیات فراہم کی جا رہی ہیں۔
فائر بریگیڈ کے عملے نے بروقت کارروائی کرتے ہوئے آگ پر قابو پا لیا، جس سے مزید نقصان سے بچاؤ ممکن ہو سکا۔ پولیس اور متعلقہ اداروں نے واقعے کی تحقیقات شروع کر دی ہیں جبکہ ابتدائی طور پر حادثے کی وجہ گیس لیکیج قرار دی جا رہی ہے۔