سیالکوٹ بیورو چیف مدثر رتو سے
ڈپٹی کمشنر سیالکوٹ صبا اصغر علی اور ڈسٹرکٹ پولیس آفیسر سیالکوٹ کیپٹن (ر) دوست محمد کی زیرِ صدارت محرم الحرام کے جلوسوں اور مجالس کے لائسنس ہولڈرز و منتظمین کا خصوصی اجلاس منعقد ہوا۔ ایڈیشنل ڈپٹی کمشنر جنرل نعیم بشیر، ایڈیشنل ایس پی حسیب، کوآرڈینیٹر ضلعی امن کمیٹی حافظ اصغر چیمہ، انچارج سیکورٹی برانچ حافظ محمد سعید،ایس ڈی پی اوز، ایس ایچ اوز، امن کمیٹی کے اراکین، لائسنس ہولڈرز اور مجالس و جلوسوں کے منتظمین نے شرکت کی۔
ڈپٹی کمشنر صبا اصغر علی نے خطاب کرتے ہوئے کہا کہ محرم الحرام کے دوران امن و امان کا قیام ہم سب کی مشترکہ اور اولین ذمہ داری ہے۔ ضلعی انتظامیہ جلوسوں اور مجالس کے تمام روٹس پر پیچ ورک، سٹریٹ لائٹس، صفائی ستھرائی، سینی ٹیشن، نکاسی آب اور دیگر شہری سہولیات کے بہترین انتظامات یقینی بنائے گی تاکہ عزاداران کو کسی قسم کی دشواری کا سامنا نہ کرنا پڑے۔ انہوں نے کہا کہ تمام متعلقہ محکمے باہمی رابطے اور ہم آہنگی کے ساتھ فرائض سرانجام دیں گے اور محرم الحرام کے پرامن انعقاد کے لیے ہر ممکن اقدامات کیے جائیں گے اور گزشتہ سال کی طرح امسال بھی حکومت کی جانب سے سبیلوں کا اہتمام کیا جائے گا۔ انہوں نے کہا کہ محرم الحرام کے دوران امن و امان، بین المسالک ہم آہنگی، سیکیورٹی انتظامات اور ضابطہ اخلاق پر عملدرآمد کے لئے ہر ممکن اقدامات کئے جائیں گے۔
ڈسٹرکٹ پولیس آفیسر کیپٹن (ر) دوست محمد نے خطاب کرتے ہوئے کہا کہ تمام جلوسوں اور مجالس کے منتظمین مقررہ قواعد و ضوابط اور اوقات کار کی سختی سے پابندی کریں گے۔ انہوں نے واضح کیا کہ ضلع سیالکوٹ ہمیشہ امن و بھائی چارے کا گہوارہ رہا ہے، محرم میں نئے جلوس، مجلس یا ایونٹ کی اجازت نہیں دی جائے گی اور تمام پروگرام روایتی شیڈول کے مطابق منعقد ہوں گے۔
ڈی پی او نے کہا کہ جن افراد کے ضلع میں داخلے پر پابندی عائد ہے یا جن کے خلاف زبان بندی کے احکامات موجود ہیں، انہیں کسی بھی مجلس یا جلوس میں مدعو نہ کیا جائے۔ سوشل میڈیا پر نفرت انگیز مواد، اشتعال انگیزی اور فرقہ وارانہ ہم آہنگی کو متاثر کرنے والی سرگرمیوں کی ہرگز اجازت نہیں ہوگی اور قانون کے مطابق کارروائی عمل میں لائی جائے گی۔انہوں نے کہا کہ ملک کو درپیش سیکیورٹی چیلنجز کے پیش نظر فول پروف سیکیورٹی انتظامات کیے جا رہے ہیں۔ تمام منتظمین اپنے رضاکاروں کی تعیناتی یقینی بنائیں جبکہ ان کی باقاعدہ تربیت بھی کروائی جائے گی۔ خواتین کی سہولت اور رہنمائی کے لیے لیڈیز رضاکار بھی خدمات سرانجام دیں گی۔ تمام مجالس اور جلوسوں کی ویڈیو ریکارڈنگ لازمی ہوگی۔
کیپٹن (ر) دوست محمد نے بتایا کہ ضلع بھر کی 160 امام بارگاہوں میں سی سی ٹی وی کیمرے نصب ہیں اور ان کی مکمل فعالیت کو یقینی بنایا جائے گا، بالخصوص داخلی و خارجی راستوں کی مؤثر نگرانی کی جائے گی۔ انہوں نے مزید کہا کہ غیر قانونی اور غیر رجسٹرڈ سبیلوں کی ہرگز اجازت نہیں دی جائے گی جبکہ ضلعی انتظامیہ کی جانب سے بھی عوامی خدمت کے لیے سبیلوں کا اہتمام کیا جائے گا۔انہوں نے کہا کہ بین المسالک ہم آہنگی اور بھائی چارے کے فروغ کے لیے "امن کا کارواں” بھی نکالا جائے گا جس میں ضلعی امن کمیٹی کے اراکین اور مختلف مکاتب فکر کے نمائندگان شریک ہوں گے۔ انہوں نے منتظمین کو ہدایت کی کہ کسی بھی مسئلے کی صورت میں فوری طور پر متعلقہ تھانے، ایس ڈی پی او یا ضلعی انتظامیہ سے رابطہ کیا جائے۔
اجلاس کے اختتام پر شرکاء نے ضلع سیالکوٹ میں محرم الحرام کے دوران امن، رواداری، مذہبی ہم آہنگی اور قانون کی پاسداری کو یقینی بنانے کے عزم کا اعادہ کیا۔