حکومت ایک بار پھر عوام سے ہاتھ کر گئی، پیٹرول پر عوام کو مکمل ریلیف سے محروم کردیا گیا

حکومت نے پیٹرولیم لیوی میں بڑی ردوبدل کرتے ہوئے ایک بار پھر عوام کو پیٹرول کی قیمتوں میں مکمل ریلیف سے محروم کر دیا، جبکہ ہائی اسپیڈ ڈیزل کی قیمت برقرار رکھنے کے لیے اس پر عائد لیوی میں نمایاں کمی کر دی گئی۔

دستاویزات کے مطابق حکومت نے پیٹرول پر عائد پیٹرولیم لیوی میں 24 روپے 74 پیسے فی لیٹر کا اضافہ کر دیا ہے۔ اس اضافے کے بعد پیٹرول پر لیوی کی شرح 91 روپے 34 پیسے فی لیٹر سے بڑھ کر 116 روپے 8 پیسے فی لیٹر ہو گئی ہے۔دوسری جانب ہائی اسپیڈ ڈیزل پر پیٹرولیم لیوی کی شرح میں 24 روپے 34 پیسے فی لیٹر کمی کی گئی ہے۔ اس فیصلے کے تحت ڈیزل پر لیوی 68 روپے 93 پیسے فی لیٹر سے کم ہو کر 44 روپے 59 پیسے فی لیٹر رہ گئی ہے۔

ذرائع کے مطابق عالمی منڈی میں تیل کی قیمتوں میں کمی کے باوجود حکومت نے پیٹرول پر لیوی بڑھا کر عوام تک مکمل ریلیف منتقل نہیں ہونے دیا۔ ماہرین کا کہنا ہے کہ لیوی میں اضافے کے باعث پیٹرول کی قیمت میں ممکنہ کمی کے اثرات محدود ہو گئے ہیں۔دستاویزات سے یہ بھی ظاہر ہوتا ہے کہ حکومت نے ہائی اسپیڈ ڈیزل پر لیوی کم کر کے اس کی قیمت کو برقرار رکھنے کی حکمت عملی اپنائی، جبکہ پیٹرول استعمال کرنے والے عام صارفین کو متوقع ریلیف سے محروم رکھا گیا۔معاشی حلقوں کا کہنا ہے کہ پیٹرولیم لیوی وفاقی حکومت کے لیے آمدنی کا ایک اہم ذریعہ ہے، تاہم اس میں اضافے سے مہنگائی کے دباؤ کا سامنا کرنے والے شہریوں پر مزید مالی بوجھ پڑ سکتا ہے۔