فٹبال کی عالمی تنظیم ’فیفا‘ نے شائقینِ فٹبال کو ورلڈ کپ 2026 کے میچوں کے دوران اسٹیڈیم میں ڈسپوزایبل پانی کی بوتل لانے کی مشروط اجازت دے دی ہے-
فیفا کے چیف آپریٹنگ آفیسر ہیمو شرگی نے مائیکرو بلاگنگ پلیٹ فارم ‘ایکس‘ پر جاری کردہ ایک ویڈیو پیغام میں اس پالیسی کی وضاحت کرتے ہوئے کہا کہ اب تمام شائقین کو امریکا اور کینیڈا میں ہونے والے فیفا ورلڈ کپ 2026 کے کسی بھی میچ کے دوران اپنے ساتھ فیکٹری سے سیل شدہ، نرم پلاسٹک کی 20 اونس (590 ملی لیٹر) کی ایک ڈسپوزایبل پانی کی بوتل اندر لے جانے کی اجازت ہوگی۔
رپورٹس کے مطابق فیفا نے اس سے قبل سیکیورٹی اور کھلاڑیوں و شائقین کو کسی بھی ممکنہ چوٹ یا خطرے سے محفوظ رکھنے کے نام پر باہر سے لائی جانے والی بوتلوں پر پابندی کا دفاع کیا تھا، اور ادارے کا کہنا ہے کہ یہ سیکیورٹی خدشات اب بھی برقرار ہیں ہیمو شرگی نے ویڈیو میں واضح کیا کہ سخت باڈی والی یا دھاتی ری یوزایبل بوتلیں سیکیورٹی وجوہات کی بنا پر اب بھی مکمل طور پر ممنوع ہوں گی۔
یہ تنازع ایک ایسے وقت میں شدت اختیار کر گیا تھا جب محکمہ موسمیات اور ماہرینِ موسمیات نے خبردار کیا ہے کہ امریکا، کینیڈا اور میکسیکو میں اوپن ائیر اسٹیڈیمز کے اندر شائقین کو شدید ترین گرمی کے باعث صحت کے سنگین خطرات کا سامنا کرنا پڑ سکتا ہے،ایک حالیہ تحقیقی رپورٹ کے مطابق ورلڈ کپ کے 104 میچوں میں سے کم و بیش 26 میچز ایسے موسمی حالات میں کھیلے جائیں گے جہاں انسانی جسم پر گرمی اور حبس کے اثرات کو ناپنے والا پیمانہ مقررہ حد سے تجاوز کرجائے گا۔
واضح رہے کہ گزشتہ سال امریکا ہی میں منعقدہ فیفا کلب ورلڈ کپ کے دوران بھی شدید گرمی کے باوجود شائقین کو اسٹیڈیم میں پانی کی بوتلیں لے جانے سے روک دیا گیا تھاجس پر بڑے پیمانے پر شکایات سامنے آئی تھیں اس بار عوامی ردِعمل کو دیکھتے ہوئے فیفا نے اسٹیڈیم کے اطراف میں مسٹنگ اسٹیشنز (پانی کی بوندیں برسانے والے نظام)، کولنگ ٹینٹس، پنکھے اور ہائیڈریشن اسٹیشنز قائم کرنے کا اعلان کیا ہےفیفا نے یقین دہانی کرائی ہے کہ اسٹیڈیم کے اندر فروخت ہونے والے پانی کی قیمتیں عام دنوں کی طرح معمول کے مطابق ہی رکھی جائیں گی تاکہ شائقین کو کسی قسم کی دشواری کا سامنا نہ کرنا پڑے۔
یہ اہم اعلان فیفا کے اس فیصلے کے محض دو دن بعد سامنے آیا ہے جس میں اسٹیڈیمز کے اندر دوبارہ استعمال ہونے والی پانی کی بوتلوں پر مکمل پابندی عائد کردی گئی تھی، جس پر شائقین نے سخت برہمی کا اظہار کیا تھا-