پاکستانی شوبز انڈسٹری کی معروف اداکارہ مومنہ اقبال کی بہن رمشا اقبال نے سوشل میڈیا پر گردش کرنے والی شادی کی تقریبات سے متعلق افواہوں اور قیاس آرائیوں پر وضاحت پیش کر دی ہے۔ ان کا کہنا ہے کہ حالیہ تمام تقریبات دراصل مومنہ اقبال کے نکاح کی خوشی میں منعقد کی گئی تھیں اور ان کے حوالے سے پھیلائی جانے والی کئی باتیں حقیقت پر مبنی نہیں ہیں۔
مومنہ اقبال کی مہندی، نکاح اور دیگر تقریبات کی ویڈیوز گزشتہ دنوں سوشل میڈیا پر وائرل ہوئی تھیں، جس کے بعد ان کی ذاتی زندگی اور شادی سے متعلق مختلف تبصرے سامنے آنا شروع ہو گئے تھے۔ اس دوران اداکارہ کا نام ایم پی اے ثاقب چدھڑ سے متعلق تنازع کے باعث بھی خبروں میں رہا۔
ایک انٹرویو میں گفتگو کرتے ہوئے رمشا اقبال نے کہا کہ نیشنل سائبر کرائم انویسٹی گیشن ایجنسی (این سی سی آئی اے) کی جانب سے ثاقب چدھڑ کے خلاف مقدمہ درج ہونے کے بعد انہیں اطمینان حاصل ہوا ہے کیونکہ ان کے بقول کیس مضبوط شواہد کی بنیاد پر آگے بڑھ رہا ہے۔
رمشا اقبال نے دعویٰ کیا کہ ملزم کے پاس مومنہ اقبال کی کوئی نجی یا ذاتی ویڈیوز موجود نہیں ہیں۔ ان کے مطابق صرف مصنوعی ذہانت (اے آئی) کی مدد سے جعلی ویڈیوز تیار کرکے انہیں سوشل میڈیا پر پھیلانے کی دھمکیاں دی جا رہی تھیں، جن کے خلاف قانونی کارروائی جاری ہے۔
شادی کی تقریبات کے حوالے سے گفتگو کرتے ہوئے انہوں نے کہا کہ سوشل میڈیا پر جن تقریبات کو رخصتی یا شادی کی مکمل رسومات قرار دیا جا رہا ہے، وہ دراصل نکاح کی خوشی میں منعقد ہونے والی تقریبات تھیں۔ ان کا کہنا تھا کہ خاندان اور قریبی عزیزوں نے اس خوشی کے موقع پر مختلف تقریبات کا اہتمام کیا تھا۔
رمشا اقبال کے مطابق مومنہ اقبال کی رخصتی ابھی نہیں ہوئی اور اس کا انعقاد آئندہ چند ماہ میں متوقع ہے۔ انہوں نے بتایا کہ رخصتی کی تقریب ممکنہ طور پر نومبر یا دسمبر میں منعقد کی جائے گی۔
مومنہ اقبال کی شادی کی تقریبات سے متعلق حقیقت سامنے آگئی
