تونسہ میں کالعدم ٹی ٹی پی کے دہشتگرد متحرک ،بلوچستان سے آنے والے دو ڈالہ گاڑیوں کو روک کر اسمگل شدہ سامان اتار لیا،گاڑیاں بھی قبضہ میں لے لیں،علاقے میں دہشتگردی کا خدشہ،شہریوں نے سیکورٹی فورسز سے کاروائی کا مطالبہ کر دیا
باخبر ذرائع کے مطابق 25 سے 30 کالعدم تحریک طالبان پاکستان (ٹی ٹی پی) کے دہشت گرد تونسہ میں پنجاب اور خیبرپختونخوا کی سرحد پر واقع بارڈر ملٹری پولیس اسٹیشن چتروٹہ کی حدود میں موجود تھے۔دہشت گردوں نے بلوچستان سے آنے والے نان کسٹم پیڈ سامان لے جانے والی دو ڈالہ گاڑیوں کو روک کر اپنے قبضے میں لے لیا۔ بعد ازاں دونوں گاڑیوں سے اسمگل شدہ سامان اتار لیا گیا۔ان پیش رفتوں کے پیش نظر اس بات کا قوی امکان موجود ہے کہ ٹی ٹی پی کے عناصر ضبط شدہ گاڑیوں کو تونسہ کے علاقے میں سرحدی سکیورٹی چوکیوں پر حملوں کے لیے استعمال کرنے کا ارادہ رکھتے ہوں۔علاقہ مکینوں نے مطالبہ کیا ہے کہ قانون نافذ کرنے والے اور سکیورٹی ادارے فوری طور پر سکیورٹی اقدامات مزید سخت کریں، تمام قریبی چیک پوسٹوں کو مضبوط بنائیں،ٹی ٹی پی دہشتگردوںکے خلاف کاروائی کی جائے تاکہ علاقہ میں امن و امان قائم رہے.
واضح رہے کہ 19 مئی کو خیبرپختونخوا، بلوچستان اور پنجاب کے سنگم پر قائم بارڈر ملٹری پولیس کے تھانہ چتروٹہ پر ٹی ٹی پی کے دہشتگردوں نے حملہ کیا تھا، دھماکہ خیز مواد سے تھانے کی عمارت کو شدید نقصان۔ دھماکوں کے بعد مسلح افراد کی جانب سے تھانے کا محاصرہ بھی کیا گیا تھا