راولپنڈی کے نیو جوڈیشنل کمپلیکس میں مبینہ ڈانس پارٹی کے معاملے پر تھانہ سول لائن پولیس نے مقدمہ درج کر لیا ہے، جبکہ وائرل ویڈیو میں نظر آنے والے افراد کی شناخت اور گرفتاری کے لیے کارروائی شروع کر دی گئی ہے۔
پولیس کے مطابق مقدمہ سیشن کورٹ کے چوکیدار تنویر حسین کی مدعیت میں درج کیا گیا۔ مدعی مقدمہ نے مؤقف اختیار کیا کہ انہوں نے سوشل میڈیا پر ایک وائرل ویڈیو دیکھی جو نیو جوڈیشنل کمپلیکس کی تھی۔ایف آئی آر کے متن کے مطابق ویڈیو میں مرد و خواتین کو نازیبا حرکات کرتے ہوئے دیکھا جا سکتا ہے اور ان کی شکلیں واضح طور پر پہچانی جا سکتی ہیں۔ مدعی نے مطالبہ کیا کہ ویڈیو میں نظر آنے والے افراد کو تلاش کرکے قانون کے مطابق گرفتار کیا جائے۔
پولیس کا کہنا ہے کہ وائرل ویڈیو کی چھان بین کا عمل جاری ہے اور اس میں شامل افراد کی شناخت کے لیے مختلف پہلوؤں سے تحقیقات کی جا رہی ہیں۔