ترجمان دفتر خارجہ کا کہنا ہے کہ پاکستانی شہریوں کی بازیابی کیلئے صومالی قیادت سے رابطے میں ہیں، صومالی قزاقوں نے کارگو شپ پر پاکستانی شہریوں کو یرغمال بنایا ہوا ہے۔
اسلام آباد میں ترجمان دفتر خارجہ طاہر حسین اندرابی نے ہفتہ وار نیوز بریفنگ میں کہا کہ پاکستان کو مشرق وسطیٰ میں حالیہ کشیدگی پر تشویش ہے، پاکستان ایران امریکا تنازع کے پُرامن حل پر یقین رکھتا ہے۔ان کا کہنا ہے کہ نائب وزیراعظم اسحاق ڈار نے صومالیہ کے وزیر خارجہ سے رابطہ کیا، صومالی وزیر خارجہ نے پاکستانی مغویوں کی رہائی کا یقین دلایا ہے۔انہوں نے بتایا کہ نائب وزیراعظم اسحاق ڈار نے ترک وزیر خارجہ حقان فیدان سے بھی رابطہ کیا، دونوں رہنماؤں نے خطے کی صورتحال پر تبادلہ خیال کیا۔
طاہر حسین اندرانی نے کہا کہ آزاد کشمیر سے متعلق بھارتی بیانات کو مسترد کرتے ہیں، بھارت حل طلب تنازعات سے توجہ ہٹانا چاہتا ہے، بھارت مقبوضہ کشمیر میں کشمیری عوام پر ظلم کررہا ہے، پاکستان آٹھ دہائیوں پُرانے کشمیر تنازع کا حل چاہتا ہے، کشمیر عالمی سطح پر تسلیم شدہ تنازع ہے۔ترجمان دفتر خارجہ نے کہا کہ پاکستان بھارت کی جانب سے پانی کو بطور ہتھیار استعمال کرنے کی اجازت نہیں دے گا، بھارت کی جانب سے پانی روکنے کے کسی بھی اقدام کے سنگین نتائج ہوں گے، پانی 25 کروڑ پاکستانیوں کیلئے لائف لائن ہے۔