قصور( طارق نوید سندھو سے ) پیرو والا روڈ میں گزشتہ 10 روز سے بجلی کا ٹرانسفارمر خراب ہونے کے باعث پورا علاقہ شدید مشکلات کا شکار ہے۔ بجلی کی مسلسل بندش سے گھروں کے ساتھ ساتھ مساجد میں بھی پانی ناپید ہو چکا ہے، جبکہ واٹر پمپ بند ہونے سے شہری پینے کے صاف پانی کی بوند بوند کو ترس گئے ہیں۔
اہل علاقہ کا کہنا ہے کہ شدید گرمی کے موسم میں پانی کی عدم دستیابی نے زندگی اجیرن بنا دی ہے۔ لوگ دور دراز علاقوں سے پانی لانے پر مجبور ہیں جبکہ متعدد بار شکایات کے باوجود لیسکو حکام کی جانب سے کوئی مؤثر کارروائی عمل میں نہیں لائی گئی۔علاقہ مکین خالی برتن اٹھا کر سڑکوں پر نکل آئے اور شدید احتجاج کرتے ہوئے مطالبہ کیا کہ فوری طور پر نیا ٹرانسفارمر نصب کرکے بجلی اور پانی کی فراہمی بحال کی جائے۔شہریوں نے اعلیٰ لیسکو حکام اور ضلعی انتظامیہ سے فوری نوٹس لینے کا مطالبہ کرتے ہوئے خبردار کیا ہے کہ اگر 24 گھنٹوں کے اندر مسئلہ حل نہ کیا گیا تو احتجاج کا دائرہ مزید وسیع کیا جائے گا۔