برطانیہ کے شہر برمنگھم میں پاکستانی قونصل خانے کے باہر ہونے والے احتجاج کے بعد ایک نئی پیش رفت سامنے آئی ہے، جہاں مظاہرے میں شریک محمد عمران شیخ نے اپنے بیان پر معذرت کر لی ہے۔
محمد عمران شیخ، جن کا تعلق آزاد کشمیر کے ضلع میرپور سے بتایا جاتا ہے، نے احتجاج کے دوران بعض سخت اور نامناسب الفاظ استعمال کیے تھے۔ واقعے کی ویڈیوز سوشل میڈیا پر گردش کرنے کے بعد معاملہ خاصی توجہ کا مرکز بن گیا۔
بعد ازاں محمد عمران شیخ نے ایک ویڈیو پیغام جاری کیا جس میں انہوں نے اپنے الفاظ پر افسوس کا اظہار کرتے ہوئے معافی مانگی۔ اپنے بیان میں انہوں نے کہا کہ احتجاج کے دوران وہ جذباتی ہو گئے تھے اور جو الفاظ ان کی زبان سے نکلے وہ مناسب نہیں تھے۔
انہوں نے آزاد کشمیر پولیس کے انسپکٹر جنرل اور متعلقہ فوجی حکام سے مخاطب ہوتے ہوئے کہا کہ اگر ان کے الفاظ سے کسی کی دل آزاری ہوئی ہے تو وہ اس پر دلی معذرت خواہ ہیں۔ ان کا کہنا تھا کہ ان کا مقصد کسی کی توہین کرنا نہیں تھا بلکہ وہ جذباتی کیفیت میں بات کر گئے تھے۔
سوشل میڈیا پر معذرتی ویڈیو سامنے آنے کے بعد صارفین کی جانب سے مختلف ردعمل دیکھنے میں آ رہے ہیں۔ بعض افراد نے معافی کو مثبت قدم قرار دیا جبکہ بعض صارفین نے اس پر طنزیہ تبصرے بھی کیے۔
برمنگھم احتجاج: محمد عمران شیخ کی معذرت
