اوکاڑہ (نامہ نگار ملک ظفر) 36 فور ایل اللہ دتہ بلوچ آبادی میں بجلی کی سہولیات کی بہتری کے لیے 10 نئے پولز اور 25 کے وی کے ٹرانسفارمر کی تنصیب کا افتتاحی پروگرام منعقد ہوا۔ تقریب کے مہمانِ خصوصی کرنل (ر) مظہر تیمور تھے، جبکہ اس منصوبے کی تکمیل میں حلقہ این اے 136 کے واپڈا کوآرڈینیٹر ملک خالد یعقوب کی خصوصی کاوشیں شامل رہیں۔
تقریب میں علی اکبر بلوچ، مہر ایاز محمود سیال، چوہدری مزمل، عرفان احمد، سحی خان اور انشاء اللہ کھوکھر سمیت علاقے کی معزز شخصیات اور بڑی تعداد میں مقامی شہریوں نے شرکت کی۔اس موقع پر مقررین نے حلقے کے عوامی مسائل کے حل اور بجلی کی بہتر فراہمی کے لیے کیے جانے والے اقدامات کو سراہا۔ علاقہ مکینوں نے مہمانوں کا پرتپاک استقبال کیا اور بالخصوص ملک خالد یعقوب کا شکریہ ادا کیا جن کی مسلسل کوششوں سے یہ منصوبہ پایۂ تکمیل تک پہنچا۔تقریب سے خطاب کرتے ہوئے ملک خالد یعقوب نے کہا کہ ان کے قائد کی خواہش ہے کہ عوام سے کیے گئے تمام وعدوں کو عملی جامہ پہنایا جائے اور حلقے کی ترقی و خوشحالی کے لیے جاری منصوبوں کو بروقت مکمل کیا جائے۔ انہوں نے کہا کہ عوامی خدمت کا یہ سفر آئندہ بھی جاری رہے گا اور بنیادی سہولیات کی فراہمی کے لیے ہر ممکن اقدامات کیے جائیں گے۔علاقہ مکینوں نے اس منصوبے کو خوش آئند قرار دیتے ہوئے امید ظاہر کی کہ اس سے بجلی کی فراہمی میں بہتری آئے گی اور مقامی آبادی کو درپیش مسائل میں خاطر خواہ کمی ہوگی۔
تقریب کے شرکاء نے حلقہ این اے 136 کے ایم این اے چوہدری ریاض الحق جج کا بھی خصوصی شکریہ ادا کیا جن کے تعاون سے علاقے میں ترقیاتی کاموں کا سلسلہ جاری ہے۔