اسلام آباد: خاتونِ اول آصفہ بھٹو زرداری نے خواتین سفارت کاروں کے عالمی دن کے موقع پر دنیا بھر میں مکالمے، تعاون اور بین الاقوامی ہم آہنگی کے فروغ کے لیے اپنی صلاحیتیں اور خدمات وقف کرنے والی خواتین کو خراجِ تحسین پیش کیا ہے۔
اپنے پیغام میں انہوں نے کہا کہ خواتین سفارت کاروں کی خدمات نے بین الاقوامی شراکت داریوں کو مضبوط بنانے اور اقوام کے درمیان اعتماد و تعاون کو فروغ دینے میں اہم کردار ادا کیا ہے۔ ان کا کہنا تھا کہ خواتین نے سفارت کاری کے میدان میں نمایاں کردار ادا کرتے ہوئے ایک پُرامن، مستحکم اور باہم مربوط دنیا کی تشکیل میں اہم حصہ ڈالا ہے۔آصفہ بھٹو زرداری نے کہا کہ پاکستان کو ان ممتاز خواتین پر فخر ہے جنہوں نے وقار، صلاحیت اور امتیاز کے ساتھ عالمی سطح پر ملک کی نمائندگی کی۔ انہوں نے بیگم رعنا لیاقت علی خان اور بیگم شائستہ اکرام اللہ کی خدمات کو سراہتے ہوئے کہا کہ ان شخصیات نے پاکستان کی سفارتی شناخت کے قیام اور اسے مضبوط بنیادوں پر استوار کرنے میں اہم کردار ادا کیا۔
خاتونِ اول نے شہید محترمہ بینظیر بھٹو کو خراجِ عقیدت پیش کرتے ہوئے کہا کہ ان کی جرات مندانہ قیادت نے پاکستان کو عالمی سطح پر نمایاں مقام دلایا اور خواتین کی سیاسی و سفارتی قیادت کے لیے نئی راہیں ہموار کیں۔انہوں نے کہا کہ پاکستانی خواتین کی متعدد نسلوں نے عوامی خدمت، خارجہ امور اور بین الاقوامی تعلقات کے شعبوں میں اپنی صلاحیتوں کا لوہا منوایا ہے اور ملک کے لیے ایک قابلِ فخر اور دیرپا ورثہ چھوڑا ہے۔