پشاور ہائیکورٹ نے قائداعظم نامی شہری درخواست گزار کی دبئی سے ڈی پورٹیشن روک دی۔
پشاور ہائیکورٹ میں قائداعظم نامی شہری کا شناختی کارڈ بلاک کیے جانے کے خلاف دائر درخواست پر سماعت ہوئی ،سماعت جسٹس وقار احمد اور جسٹس عنایت اللہ خان نے کی،وکیل درخواست گزار نے کہا کہ درخواست گزار کا پاکستان اور دبئی میں کاروبار ہے، درخواست گزار کا شناختی کارڈ بلاک کر دیا گیا ہے۔
اس موقع پر ڈائریکٹر لیگل نادرا کا کہنا تھا کہ درخواست گزار کا شناختی کارڈ مشکوک ہونے کی بنیاد پر بلاک کیا گیا ہے،عدالت نے آئندہ سماعت تک درخواست گزار کی دبئی سے ڈی پورٹیشن روکتے ہوئے کہا کہ درخواست گزار نادرا بورڈ کے سامنے پیش ہو جائیں پھر اس کیس کا فیصلہ کریں گے۔
دوسری جانب خیبرپختونخوا میں افغان باشندوں سے جڑے 60 ہزار سے زائد مشکوک قومی شناختی کارڈز کا انکشاف ہوا ہے ، نادرا نےواپس جانے والے افغان مہاجرین کے شناختی دستاویزات کی جانچ پڑتال شروع کردی،واپس جانے والے ہر افغان مہاجر کے بائیو میٹرک،اے سی ار اور پی او ار کارڈ کی سکیننگ جاری ہے،افغان مہاجرین کوفیملی ٹری میں شامل کرنے والےمقامی باشندوں کی تلاش بھی جاری ہے،ایک سال کے دوران،جعل سازی میں ملوث 300 سے زائد نادرا اہلکاروں کے خلاف کارروائی ہوئی،اہلکاروں کے کئی کیس خود پکڑ کر ایف ائی اے کے حوالے کے گئے۔