اسلام آباد پولیس میں بھرتی کے لیے جاری فزیکل ٹیسٹ کے دوران ایک نوجوان امیدوار جان کی بازی ہار گیا۔
پولیس کے مطابق پولیس لائنز اسلام آباد میں بھرتی کے فزیکل ٹیسٹ کے دوران امیدوار اسحاق دوڑ کے مرحلے میں شریک تھا کہ اچانک گر کر بے ہوش ہوگیا،گرمی، حبس اور شدید جسمانی مشقت کے باعث نوجوان کی سانس پھول گئی، جس کے بعد وہ زمین پر گر پڑا،واقعے کے فوراً بعد اسحاق کو پولیس لائنز میں موجود ایمبولینس کے ذریعے پاکستان انسٹی ٹیوٹ آف میڈیکل سائنسز کے ایمرجنسی وارڈ منتقل کیا گیا،تاہم ڈاکٹروں کے مطابق وہ اسپتال پہنچنے سے قبل ہی راستے میں دم توڑ چکا تھا۔
پولیس کے مطابق جاں بحق ہونے والے اسحاق کی عمر 24 سے 25 سال کے درمیان بتائی گئی ہےمرحوم اسحاق کا تعلق خیبر پختونخوا کے ضلع لکی مروت کی تحصیل سرائے نورنگ سے تھا،واقعے کے بعد پولیس کی جانب سے مزید قانونی کارروائی اور حقائق کے تعین کا عمل جاری ہے۔
اسلام آباد پولیس میں بھرتی کے لئے پاکستان بھر میں مختلف بھرتی سینٹرز پر فزیکل ٹیسٹ کے انعقاد کے پہلے دن،اسلام آباد پولیس کے سینئر افسران نے تمام عمل کی نگرانی کی، آئی جی اسلام آباد سید علی ناصر رضوی کے احکامات پر بہترین سکیورٹی و انتظامی امور کو یقینی بنایا گیا۔