کراچی کے مختلف علاقوں میں گیس کی بو کی شکایات سامنے آنے کے بعد سوئی سدرن گیس کمپنی (ایس ایس جی سی) نے صورتحال پر وضاحت جاری کرتے ہوئے کہا ہے کہ شہر میں کسی قسم کی گیس لیکج نہیں ہوئی اور صارفین کو پریشان ہونے کی ضرورت نہیں۔
ترجمان ایس ایس جی سی کے مطابق ابو الحسن اصفہانی روڈ پر بچھائی گئی نئی گیس پائپ لائن کی گزشتہ روز ٹیسٹنگ کی گئی تھی۔ اس عمل کے دوران حفاظتی طریقہ کار کے تحت گیس میں بو پیدا کرنے والا مخصوص کیمیکل معمول سے زیادہ مقدار میں شامل ہوگیا، جس کے باعث مختلف علاقوں میں گیس جیسی بو محسوس کی گئی۔
ترجمان نے بتایا کہ ٹیسٹنگ کے بعد شہریوں کی جانب سے متعدد علاقوں سے گیس لیکج کی شکایات موصول ہوئیں، تاہم فوری طور پر تکنیکی ٹیموں نے سسٹم کا تفصیلی جائزہ لیا۔ جانچ کے دوران کہیں بھی گیس کے اخراج یا پائپ لائن میں خرابی کی تصدیق نہیں ہوئی۔
ایس ایس جی سی کے مطابق گیس سپلائی کا نظام مکمل طور پر معمول کے مطابق کام کر رہا ہے اور تمام پریشر لیول بھی محفوظ حد میں ہیں۔ کمپنی کی مانیٹرنگ ٹیمیں صورتحال پر مسلسل نظر رکھے ہوئے ہیں تاکہ کسی بھی ممکنہ مسئلے کی صورت میں فوری کارروائی کی جا سکے۔
ترجمان نے واضح کیا کہ شہریوں کو جو بو محسوس ہو رہی ہے وہ صرف ٹیسٹنگ کے دوران شامل کیے گئے کیمیکل کی وجہ سے ہے، نہ کہ کسی گیس لیکج کے باعث۔ انہوں نے عوام سے اپیل کی کہ وہ افواہوں پر توجہ نہ دیں اور اطمینان کے ساتھ اپنی روزمرہ سرگرمیاں جاری رکھیں۔
ایس ایس جی سی نے مزید کہا کہ اگر کسی علاقے میں غیر معمولی صورتحال محسوس ہو یا کسی شہری کو حقیقی گیس لیکج کا شبہ ہو تو فوری طور پر کمپنی کی ہیلپ لائن یا متعلقہ کنٹرول روم سے رابطہ کیا جائے تاکہ تکنیکی عملہ موقع پر پہنچ کر ضروری کارروائی کر سکے۔
کراچی میں گیس کی بو پر ایس ایس جی سی کی وضاحت، کسی لیکج کی تصدیق نہیں
