آزادکشمیر قانون ساز اسمبلی کے انتخابات کے دوسرے مرحلے میں اب تک کے غیر سرکاری اور غیر حتمی نتائج میں پاکستان مسلم لیگ ن نے 14 نشتوں پر کامیابی کے ساتھ میدان مارلیا جبکہ پیپلزپارٹی کے حصے میں اب تک 5 سیٹیں آئی ہیں۔
اتوار کو آزاد جموں وکشمیر قانون ساز اسمبلی انتخابات کے دوسرے مرحلے میں مظفر آباد ڈویژن کے 8 حلقوں اور مہاجرین کی 12 نشستوں پر ووٹنگ ہوئی،مظفر آباد ڈویژن کے 8 حلقوں پر پولنگ شام 6 بجے تک جاری رہی جبکہ حلقہ ایل اے 27 میں موسم کی خرابی اور لینڈسلائڈنگ کے باعث عملہ اور پولنگ کا سامان نہ پہنچ سکا، تمام 196 پولنگ اسٹیشنوں پر انتخابات ملتوی کردیے گئے۔
آزاد کشمیر کی قانون ساز اسمبلی کُل 53 نشستوں پر مشتمل ہے ان میں سے 33 نشستوں پر آزاد کشمیر کے اندر مقیم تقریباً ساڑھے 44 لاکھ مقامی شہری ووٹ ڈالتے ہیں، 8 نشستیں خواتین، ٹیکنوکریٹس اور سمندر پار کشمیریوں کے لیے مخصوص کی گئی ہیں، جبکہ 12 نشستیں پاکستان کے مختلف شہروں جیسے کراچی، لاہور، سیالکوٹ اور راولپنڈی وغیرہ میں مقیم کشمیری مہاجرین کے لیے ہیں جہاں وہ اپنے نمائندوں کا انتخاب کرتے ہیں۔
2 جولائی کو آزاد جموں و کشمیر قانون ساز اسمبلی کے انتخابات کے دوسرے مرحلے میں مظفرآباد ڈویژن کی 8 اور کشمیری مہاجرین کی 12 نشستوں پر ووٹ ڈالے گئےنتائج کا اعلان کرتے ہوئے چیف الیکشن کمشنر آزاد کشمیر نے بتایا کہ ان نشستوں پر مسلم لیگ (ن) 13 سیٹوں پر کامیاب رہی ہے جبکہ پیپلز پارٹی کے حصے میں 5 سیٹیں آئی ہیں۔
غیر حتمی نتائج کے مطابق ایل اے 25 سے مسلم لیگ (ن) کے شاہ غلام قادر کامیاب قرار پائے ہیں، جبکہ ایل اے 30 سے (ن) لیگ کے مصطفیٰ بشیر عباسی اور ایل اے 32 سے سابق وزیراعظم اور (ن) لیگ کے سینئر رہنما راجہ محمد فاروق حیدر نے فتح حاصل کی ہے،ایل اے 34 سے (ن) لیگ کے ناصر حسین ڈار، ایل اے 35 سے چوہدری محمد اسماعیل، ایل اے 36 سے محمد احسن رضا اور ایل اے 37 سے مریم جاوید کامیاب ہوئیں،ایل اے 38 سے ذیشان علی، ایل اے 39 سے راجہ محمد صدیق، ایل اے 41 سے محمد عامر شاہ، ایل اے 42 سے سید شوکت علی شاہ، ایل اے 43 سے محمد یاسین لون اور ایل اے 44 سے محمد احمد رضا قادری نے بھی غیر حتمی نتائج کے مطابق اپنی نشستیں جیت لی ہیں۔
دوسری جانب پاکستان پیپلز پارٹی نے بھی 5 اہم حلقوں پرکامیابی حاصل کی ،غیر سرکاری نتائج کے مطابق ایل اے 26 سے پیپلز پارٹی کے میاں عبدالوحید اور ایل اے 29 سے سردار مختار خان کامیاب ہوئے ہیں۔ اس کے ساتھ ہی ایل اے 33 سے پیپلز پارٹی کے دیوان علی خان، ایل اے 40 سے عامر غفار لون اور ایل اے 45 سے عبدالماجد خان نے شاندار کامیابی اپنے نام کی ہے۔