ایسا محسوس ہوا جیسے آج ہماری جان نہیں بچے گی،ایئرانڈیا کے مسافرنے بتایا خوفناک احوال

بھارت جانے والی ایئر انڈیا کی ایک پرواز دورانِ سفر اچانک شدید فضائی جھٹکوں (ٹربولینس) کی زد میں آ گئی، جس کے نتیجے میں عملے کے 4 ارکان سمیت مجموعی طور پر 17 مسافر زخمی ہو گئے۔

بھارتی میڈیا کے مطابق تھائی لینڈ کے شہر پھوکٹ سے نئی دہلی آنے والی اس پرواز میں 137 مسافر اور 8 عملے کے ارکان سوار تھے۔ دورانِ پرواز اچانک شدید فضائی جھٹکوں کے باعث طیارہ غیر معمولی طور پر نیچے آیا، جس سے متعدد مسافر اپنی نشستوں سے اچھل گئے جبکہ طیارے کو بھی معمولی نقصان پہنچا۔پرواز کو بحفاظت نئی دہلی کے اندرا گاندھی انٹرنیشنل ایئرپورٹ پر اتارا گیا، جہاں زخمی مسافروں کو اسٹریچر کے ذریعے ایمبولینسوں میں منتقل کر کے فوری طبی امداد فراہم کی گئی۔

ایک اطالوی خاتون مسافر نے اپنے خوفناک تجربے کا بیان کرتے ہوئے کہا کہ اچانک آنے والے شدید جھٹکوں کے باعث ان کی بہن اپنی نشست سے ہوا میں اچھل گئی، جبکہ ان کی والدہ کے سر پر چوٹ آئی۔ انہوں نے بتایا کہ کئی دیگر مسافر بھی زخمی ہوئے اور ایک شخص کے چہرے سے خون بہہ رہا تھا۔خاتون مسافر کے مطابق، "ہمیں ایسا محسوس ہوا جیسے آج ہماری جان نہیں بچے گی، وہ لمحے انتہائی خوفناک تھے۔”دوسری جانب ایئر انڈیا کا کہنا ہے کہ کسی بھی مسافر یا عملے کے رکن کو شدید نوعیت کی چوٹ نہیں آئی۔ ایئرلائن کے مطابق تمام زخمیوں کو احتیاطی تدابیر کے تحت اسپتال منتقل کیا گیا، جہاں ابتدائی طبی معائنے کے بعد 5 افراد کو فارغ کر دیا گیا، جبکہ دیگر زخمیوں کا علاج جاری ہے۔