وزیراعظم کے مشیر برائے بین الصوبائی رابطہ رانا ثنا اللہ نے یومِ استحصالِ کشمیر کے موقع پر کہا ہے کہ 5 اگست بھارتی غیر قانونی زیرِ تسلط جموں و کشمیر کے عوام پر ڈھائے جانے والے مظالم کی یاد دلاتا ہے۔
اپنے پیغام میں رانا ثنا اللہ نے کہا کہ بھارت نے 5 اگست 2019 کو مقبوضہ جموں و کشمیر کی خصوصی آئینی حیثیت ختم کرکے کشمیری عوام کے حقِ خودارادیت پر براہِ راست حملہ کیا پاکستان جموں و کشمیر کی حیثیت، آبادی کے تناسب اور سیاسی شناخت کو یکطرفہ طور پر تبدیل کرنے کی ہر کوشش کو مسترد کرتا ہے،5 اگست 2019 کے بعد مقبوضہ جموں و کشمیر میں انسانی حقوق کی صورتحال مزید ابتر ہوئی ہے، جبکہ ماورائے عدالت قتل، جبری گمشدگیاں، فوجی کارروائیاں اور طویل حراستوں نے مقامی آبادی میں عدم تحفظ کو بڑھا دیا ہے۔
انہوں نے کہا کہ اس موقع پر وہ اپنے کشمیری بھائیوں اور بہنوں کے ساتھ مکمل یکجہتی کا اظہار کرتے ہیں”کشمیر پاکستان ہے اور پاکستان کشمیر ہے” جبکہ تحریکِ آزادیٔ جموں و کشمیر، تحریکِ تکمیلِ پاکستان ہے پاکستان کشمیری عوام کی لازوال قربانیوں، ہمت، ثابت قدمی اور انصاف کے لیے غیرمتزلزل عزم کو سلام پیش کرتا ہے اور ان کی منصفانہ جدوجہد کی اخلاقی، سیاسی اور سفارتی حمایت جاری رکھے گا۔
رانا ثناء اللہ نے اقوامِ متحدہ اور عالمی برادری سے مطالبہ کیا کہ وہ مقبوضہ جموں و کشمیر میں انسانی حقوق کی خلاف ورزیوں کا نوٹس لے اور مسئلہ کشمیر کو اقوامِ متحدہ کی سلامتی کونسل کی متعلقہ قراردادوں کے مطابق حل کرانے کے لیے مؤثر کردار ادا کرے۔ انہوں نے کہا کہ کشمیر کا مسئلہ صرف کشمیریوں کا نہیں بلکہ انسانیت اور عالمی انصاف کا مسئلہ ہے۔
چیئرمین پرائم منسٹر یوتھ پروگرام رانا مشہود احمد خان نے یومِ استحصالِ کشمیر کے موقع پر کہا ہے کہ 5 اگست بھارتی غیر آئینی اور غیر قانونی اقدامات کے خلاف کشمیری عوام کے ساتھ اظہارِ یکجہتی اور ان کے حقِ خودارادیت کی حمایت کے عزم کی تجدید کا دن ہے۔
اپنے پیغام میں رانا مشہود احمد خان نے کہا کہ بھارت نے 5 اگست 2019 کو مقبوضہ جموں و کشمیر کی خصوصی آئینی حیثیت ختم کرکے اقوامِ متحدہ کی سلامتی کونسل کی قراردادوں اور بین الاقوامی قوانین کی خلاف ورزی کی،کشمیری عوام کی جدوجہد انصاف، امن، بنیادی انسانی حقوق اور حقِ خودارادیت کی جدوجہد ہے،مقبوضہ جموں و کشمیر میں انسانی حقوق کی خلاف ورزیاں، اظہارِ رائے پر پابندیاں اور شہری آزادیوں پر قدغنیں تشویش کا باعث ہیں۔
انہوں نے کہا کہ 5 اگست 2019 کے بعد بھارت کے اقدامات سے علاقے کی آبادیاتی اور سیاسی ساخت تبدیل ہونے کے خدشات پیدا ہوئے، جبکہ غیر کشمیری افراد کو ڈومیسائل سرٹیفکیٹس کے اجرا نے مقامی آبادی کے حقوق، شناخت اور سیاسی نمائندگی سے متعلق تحفظات کو مزید بڑھا دیا ہے،عالمی برادری مقبوضہ جموں و کشمیر کی صورتحال کا فوری نوٹس لے اور مسئلہ کشمیر کے منصفانہ، پرامن اور دیرپا حل کے لیے مؤثر کردار ادا کرے۔
رانا مشہود احمد خان نے کہا کہ پاکستان کشمیری عوام کی سیاسی، سفارتی اور اخلاقی حمایت جاری رکھے گا اور مسئلہ کشمیر کا حل اقوامِ متحدہ کی سلامتی کونسل کی متعلقہ قراردادوں اور کشمیری عوام کی امنگوں کے مطابق ہونا چاہیےانہوں نے اس عزم کا اعادہ کیا کہ پاکستان مقبوضہ جموں و کشمیر کے عوام کے ساتھ کھڑا ہے اور ان کے حقوق کے لیے ہر عالمی فورم پر آواز بلند کرتا رہے گا۔