مکہ مشترکہ دفاعی معاہدے سے ہمیں کوئی خطرہ نہیں ، ترجمان ایرانی وزارت خارجہ

ایرانی وزارت خارجہ کے ترجمان اسماعیل بقائی نے کہا ہے کہ مکہ مشترکہ دفاعی معاہدے سے ایران کو کوئی خطرہ نہیں۔

اسماعیل بقائی کا کہنا تھا کہ ایران نے ہمیشہ امن کی بات کی ہے، جب تک معاہدے کی خلاف ورزی ہوتی رہے گی ، امریکا سے کوئی بات نہیں ہو گی، آبنائے ہرمز سے متعلق ایران اور عمان کے درمیان مثبت مذاکرات ہوئے، تیسری قوت مداخلت نہ کرے تو آبنائے ہرمز کو کھولا جا سکتا ہے، امریکا مشرق وسطی میں عدم استحکام کا ذمہ دار ہے،معاہدے کے باوجود اسرائیل نے غزہ میں بمباری کی، اسرائیل خطے میں اشتعال انگیزی پھیلا رہا ہے ، ایران ہمیشہ فلسطین کی حمایت جاری رکھے گا۔

انہوں نے کہا کہ علاقائی ممالک کو احساس ہو چکا ہے کہ سکیورٹی ایسی چیز نہیں جسے جھوٹوں سے خریدا جا سکے، خطے کی جغرافیائی اور تاریخی حقیقتوں کو مدنظر رکھنے اور خطرات کی درست نشاندہی کرنے والا جامع منصوبہ علاقائی سلامتی کے فروغ اور صہیونی دشمن اور اس کے اتحادیوں کی جانب سے عدم استحکام اور مبینہ زیادتیوں کی روک تھام میں مددگار ہو سکتا ہے۔

اسماعیل بقائی نے ایران، لبنان اور فلسطین میں شہید صحافیوں کو خراج عقیدت پیش کرتے ہوئے کاہ کہ 2 سال میں ذمہ داریاں نبھاتے ہوئے کئی صحافی شہید ہو گئے ہیں۔

اس سے قبل ایرانی وزیر خارجہ عباس عراقچی نے بھی کہا تھا کہ کہ امریکا سے عبوری معاہدے کی خلاف ورزی تک بات چیت نہیں ہو گی،تہران اور مسقط کے درمیان معاہدہ حتمی مراحل میں ہے، تاہم معاہدے کے باوجود آبنائے ہرمز کو فوری طور پر دوبارہ بحری آمدورفت کے لیے نہیں کھولا جائے گا۔