اسلام آباد میں کمانڈر نیشنل اسٹریٹیجک کمانڈ جنرل سید عامر رضا کو نشان امتیاز ملٹری سے نوازنے کی پروقار تقریب ایوان صدر میں منعقد ہوئی، جہاں صدر مملکت آصف علی زرداری نے جنرل سید عامر رضا کو اعلیٰ عسکری اعزاز عطا کیا۔
تقریب میں صدر آصف علی زرداری، وزیراعظم شہباز شریف، فیلڈ مارشل سید عاصم منیر اور تینوں مسلح افواج کے سروسز چیفس سمیت اعلیٰ سول اور عسکری حکام نے شرکت کی۔
نائب وزیراعظم و وزیر خارجہ اسحاق ڈار، چیئرمین سینیٹ، وفاقی وزرا اور دیگر اہم شخصیات بھی تقریب میں موجود تھیں۔ تقریب کے دوران جنرل سید عامر رضا کو قومی دفاع اور ذمہ داریوں کی انجام دہی میں خدمات کے اعتراف میں نشان امتیاز ملٹری سے نوازا گیا۔
نشان امتیاز ملٹری پاکستان کے اعلیٰ عسکری اعزازات میں شمار ہوتا ہے جو مسلح افواج کے افسران کو نمایاں خدمات اور غیر معمولی کارکردگی کے اعتراف میں دیا جاتا ہے۔
جنرل سید عامر رضا نیشنل اسٹریٹیجک کمانڈ کی قیادت کر رہے ہیں، جو ملک کی اسٹریٹیجک دفاعی صلاحیتوں سے متعلق اہم ذمہ داریاں انجام دیتی ہے۔ ان کی خدمات کے اعتراف میں اعزاز دیے جانے کی تقریب میں ملک کی اعلیٰ ترین سیاسی اور عسکری قیادت کی شرکت بھی نمایاں رہی۔
ایوان صدر میں ہونے والی اس تقریب کے موقع پر ملکی دفاع اور قومی سلامتی کے لیے مسلح افواج کی خدمات کو بھی سراہا گیا۔ اعلیٰ حکام کی موجودگی نے تقریب کی اہمیت کو مزید نمایاں کردیا۔
جنرل عامر رضا کو نشان امتیاز ملٹری سے نواز دیا گیا
