راولپنڈی واقعہ: ملزم کے پی ہاؤس میں رہتا رہا اور پی ٹی آئی قیادت سے ملتا رہا، طلال چوہدری

وزیر مملکت برائے داخلہ طلا ل چوہدری نے کہا ہے کہ گزشتہ روز راولپنڈی میں افسوسناک واقعہ ہوا، سکیورٹی فورسز پرحملہ کرکے ان کی جان لینے کی کوشش کی گئی۔

پریس کانفرنس سیں طلا ل چوہدری نے کہا کہ پی ٹی آئی قیادت راولپنڈی مال روڈ واقعے سے خود کو بری الذمہ نہیں قرار دے سکتی، ہلاک ملزم خیبر پختونخوا ہاؤس میں رہتا رہا اور تحریک انصاف کی قیادت سے بھی ملتا رہاجوابی کارروائی میں جاں بحق شخص کا دماغی توازن درست نہیں تھا ، اگر ذہنی توازن درست نہیں تھا تو پہلے ہی خود سے الگ کیوں نہیں کیا گیا ؟ کیا حملہ آورنے اپنے گھر کے کسی فرد پر حملہ کیا؟پی ٹی آئی اپنے کارکنوں کی اچھی تربیت کرے ، پی ٹی آئی کے سیاسی رہنما متنفر ہو کر پارٹی سے الگ ہو رہے ہیں، پی ٹی آئی نفرت اور انتشار کی سیاست ترک کرے۔

انہوں نے مزید کہا کہ گزشتہ روز جس اہلکار پر حملہ کیا گیا ، وہ ڈیوٹی کر رہا تھا، کیا جلاؤ گھیراؤ کی سیاست سے ملک کی خدمت ہو رہی ہے؟ سیاست کا نام خدمت ہے ،خیبر پختونخوا میں 17 سال سے آپ کی حکومت ہے وہاں کے لوگوں کو کیا دیا ہے؟ جب لوگوں کے ذہنوں میں نفرت بھر دی جائے تو ایسے واقعات ہوتے ہیں،بیرون ملک بیٹھے عناصر ویوز اور کمائی کے لیے اداروں کیخلاف ہرزہ سرائی کرتے ہیں، پاکستان میں استحکام آ رہا ہے ، امن کو خراب کرنے نہیں دیں گے۔