برطانیہ میں شدید گرمی کی نئی لہر نے درجہ حرارت کو 35 ڈگری سینٹی گریڈ سے اوپر پہنچا دیا ہے، جبکہ بعض علاقوں میں درجہ حرارت 38 ڈگری سینٹی گریڈ تک جانے کا امکان ظاہر کیا جا رہا ہے۔
تازہ ترین اعداد و شمار کے مطابق سرے کے علاقے چارل ووڈ میں درجہ حرارت 35.3 ڈگری سینٹی گریڈ ریکارڈ کیا گیا، جو ملک کے مختلف علاقوں میں اب تک ریکارڈ کیے جانے والے بلند ترین درجہ حرارت میں شامل ہے۔ وِزلی میں 34.4 ڈگری، ٹیڈنگٹن میں 33.5 ڈگری جبکہ ہیتھرو، پرشور اور دیگر علاقوں میں بھی درجہ حرارت 33 ڈگری سینٹی گریڈ سے تجاوز کر گیا۔
موسمیاتی ماہرین کے مطابق رواں سال برطانیہ میں گرمی کی شدت غیر معمولی رہی ہے۔ اب تک نو دن ایسے گزر چکے ہیں جب درجہ حرارت 35 ڈگری سینٹی گریڈ سے زیادہ ریکارڈ کیا گیا۔ اسی طرح 24 دنوں میں درجہ حرارت 32 ڈگری سے اوپر اور 38 دنوں میں 30 ڈگری سینٹی گریڈ سے زیادہ رہا۔
ماہرین کا کہنا ہے کہ اگر درجہ حرارت 38 ڈگری سینٹی گریڈ سے تجاوز کرتا ہے تو یہ رواں سال کا گرم ترین دن ہوگا۔ تاہم اگر پارہ 38.5 ڈگری سینٹی گریڈ تک پہنچ گیا تو برطانیہ میں اگست کے مہینے کا نیا درجہ حرارت ریکارڈ بن سکتا ہے، اگرچہ اس امکان کو نسبتاً کم قرار دیا جا رہا ہے۔
رپورٹس کے مطابق اگر آج درجہ حرارت 36 ڈگری سینٹی گریڈ یا اس سے زیادہ پہنچتا ہے تو سال 2026 برطانیہ کی تاریخ میں 36 ڈگری یا اس سے زیادہ درجہ حرارت والے دنوں کے حوالے سے ریکارڈ سال بن سکتا ہے۔ اس وقت 2026 کا شمار 1990، 2003 اور 2020 کے ساتھ کیا جا رہا ہے۔
شدید گرمی کی یہ لہر برطانیہ میں رواں سال کی پانچویں ہیٹ ویو قرار دی جا رہی ہے، جس کے باعث صحت، پانی کی فراہمی اور جنگلاتی آگ کے خطرات سے متعلق خدشات میں بھی اضافہ ہو گیا ہے۔
برطانیہ میں گرمی کی شدت 35 ڈگری سے تجاوز
