لاہور پاسپورٹ آفس میں شہریوں کی لمبی قطاریں، ایجنٹ مافیا کی شکایات پر محسن نقوی برہم

لاہور: وفاقی وزیر داخلہ محسن نقوی نے پاسپورٹ آفس گارڈن ٹاؤن کا اچانک دورہ کیا، جہاں پاسپورٹ بنوانے کے لیے آئے شہریوں کی لمبی قطاریں اور کئی کئی گھنٹے انتظار کی صورتحال دیکھ کر شدید برہمی کا اظہار کیا۔

دورے کے دوران کئی کاؤنٹرز خالی جبکہ متعدد جگہوں پر عملہ موجود نہیں تھا۔ شہریوں نے وفاقی وزیر داخلہ کے سامنے شکایات کے انبار لگا دیے۔ شہریوں کا کہنا تھا کہ وہ صبح سے پاسپورٹ آفس میں موجود ہیں، چار گھنٹے گزرنے کے باوجود ان کی باری نہیں آئی۔شہریوں نے شکایت کی کہ پاسپورٹ آفس کے باہر ایجنٹ مافیا سرگرم ہے اور جلد کام کروانے کے عوض سرعام رقم طلب کی جاتی ہے۔ ایک شہری نے بتایا کہ اس نے ایجنٹ کو 5 ہزار 500 روپے دیے ہیں۔ایک بزرگ شہری نے شکایت کی کہ اسے آج پاسپورٹ ملنا تھا، تاہم عملہ کہہ رہا ہے کہ ابھی پاسپورٹ پرنٹ نہیں ہوا۔

وفاقی وزیر داخلہ محسن نقوی نے صورتحال پر شدید برہمی کا اظہار کرتے ہوئے انچارج پاسپورٹ آفس، ڈپٹی ڈائریکٹر شہزاد اسلم کو بدنظمی اور فرائض سے غفلت پر عہدے سے ہٹانے کا حکم دے دیا۔محسن نقوی نے پاسپورٹ آفس کے باہر ایجنٹ مافیا کی موجودگی پر ڈپٹی ڈائریکٹر اینٹی کرپشن ایف آئی اے لاہور کو بھی عہدے سے ہٹانے کا حکم دیا۔وفاقی وزیر داخلہ نے شہریوں کی شکایات کے ازالے کے لیے موقع پر ہی احکامات جاری کیے اور شہریوں سے گفتگو کرتے ہوئے کہا کہ ’’میں آپ سے ذاتی طور پر معذرت خواہ ہوں۔‘‘محسن نقوی نے کہا کہ یہ صورتحال انتہائی افسوسناک ہے، شہریوں کے ساتھ اس طرح کا سلوک ناقابل برداشت ہے۔ پاسپورٹ آفس میں شہریوں کو تیز رفتار خدمات کی فراہمی پر کوئی سمجھوتہ نہیں ہوگا۔انہوں نے واضح کیا کہ کوتاہی یا غفلت پر بلاتفریق تادیبی کارروائی کی جائے گی۔ شہریوں کو سہولتیں فراہم کرنا حکومت کی ذمہ داری بھی ہے اور فرض بھی۔