لاہور: امیر جماعت اسلامی حافظ نعیم الرحمان نے کہا ہے کہ 12 ربیع الاول کے بعد پورے ملک میں پہیہ جام ہو گا۔
امیر جماعت اسلامی پاکستان حافظ نعیم الرحمان نے دھرنے کے شرکا سے خطاب کرتے ہوئے کہا کہ حکمران طبقہ اپنے ٹیکس اور قرضے معاف کرا رہا ہے جبکہ غریب کے لیے بجلی کا بل اس کی تنخواہ سے بھی زیادہ ہو گیا ہے، کھربوں روپے کا ٹیکس عوام سے مجبوری کے نام پر وصول کیا جا رہا ہے، جبکہ حکمران طبقے کو مختلف سہولیات حاصل ہیں اب یہ معاملہ صرف جماعت اسلامی کے کارکنوں تک محدود نہیں رہا بلکہ جدوجہد میں عام لوگ بھی شامل ہوچکے ہیں۔
حافظ نعیم الرحمان نے اعلان کیا کہ 12 ربیع الاول کے بعد پورے ملک میں پہیہ جام ہو گا، بڑے دھرنوں اور ہڑتال کے بعد اب اسلام آباد جانے کی باری ہے، جماعت اسلامی عوام کے حقوق کے حصول تک اپنی جدوجہد جاری رکھے گی۔
واضح رہے کہ جماعت اسلامی کا گزشتہ چار روز سے پیٹرولیم لیوی کے خلاف وزیر اعلیٰ پنجاب ہاؤس کے باہر دھرنا جاری ہے جس کی قیادت حافظ نعیم الرحمان خود کر رہے ہیں۔ جبکہ دیگر صوبوں کے گورنر ہاؤسز کے سامنے جماعت اسلامی کے کارکنان دھرنا دیئے بیٹھے ہیں۔