میر رضا قتل کیس میں مقتول کے بزنس پارٹنر کے بھائی عبداللہ نے بھی ضمانت قبل از گرفتاری کے لیے ایڈیشنل ڈسٹرکٹ اینڈ سیشن عدالت شرقی سے رجوع کرلیا۔
عدالت نے عبداللہ کی عبوری ضمانت منظور کرتے ہوئے اسے ایک لاکھ روپے کے مچلکے جمع کرانے کا حکم دے دیا۔عبداللہ کے وکیل خالد ممتاز ایڈووکیٹ نے مؤقف اختیار کیا کہ ان کے مؤکل میر رضا کو چاکلیٹ سپلائی کرتے تھے اور کام سے فارغ ہونے کے بعد عموماً رات کے اسی وقت ان کی میر رضا سے بات ہوتی تھی۔ وکیل کے مطابق وقوعے کی رات بھی عبداللہ کی میر رضا سے رات ساڑھے تین بجے فون پر بات ہوئی تھی۔
وکیل نے عدالت کو بتایا کہ پولیس درخواست گزار کو ہراساں کر رہی ہے، لہٰذا اسے گرفتار نہ کیا جائے اور ضمانت دی جائے۔ عدالت نے دلائل سننے کے بعد عبداللہ کی عبوری ضمانت منظور کرلی۔