مظفرگڑھ: سرکاری اسکولوں میں تعلیم کے ساتھ ساتھ طلبہ کو عملی سرگرمیوں سے روشناس کرانے کے لیے موسمی سبزیاں اگانے کی ہدایت کردی گئی۔
محکمہ تعلیم کی جانب سے تمام سرکاری اسکولوں کے سربراہان کو مراسلہ جاری کیا گیا ہے، جس میں تعلیمی اداروں میں موسمی سبزیوں کی کاشت یقینی بنانے کی ہدایت کی گئی ہے۔ مراسلے کے مطابق اسکولوں میں دستیاب جگہوں پر موسمی سبزیاں کاشت کی جائیں اور ان کی مناسب دیکھ بھال کے لیے ایک ذمہ دار شخص مقرر کیا جائے۔
محکمہ تعلیم نے ہدایت کی ہے کہ جن اسکولوں میں پہلے سے کاشت کی گئی سبزیوں کی پیداوار تسلی بخش نہیں ہوئی، وہاں دوبارہ کاشت کا عمل شروع کیا جائے۔ اس کے ساتھ ساتھ پودوں کو بروقت پانی دینے اور ان کی مناسب نگہداشت کا بھی انتظام کیا جائے۔
مراسلے میں اسکول انتظامیہ کو سبزیوں کی کاشت، دیکھ بھال اور نگہداشت کی تصاویر روزانہ کی بنیاد پر شیئر کرنے کی بھی ہدایت کی گئی ہے تاکہ سرگرمی کی باقاعدہ نگرانی کی جاسکے۔
محکمہ تعلیم نے تمام ہیڈ ماسٹرز کو ہدایت پر سختی سے عملدرآمد یقینی بنانے اور اسکولوں میں موسمی سبزیوں کی مناسب دیکھ بھال کا انتظام کرنے کا حکم دیا ہے۔