وزیراعظم آزاد کشمیر نے پنجاب کی طرز پر تیز رفتار ترقیاتی عمل آگے بڑھانے کا اعلان کیا ہے-
پاکستان مسلم لیگ (ن) آزاد جموں و کشمیر کی حکومت کی جانب سے عوام کو بنیادی سہولیات ان کی دہلیز پر فراہم کرنے اور ریاست میں ترقیاتی عمل کو نئی رفتار دینے کے لیے 100 روزہ اصلاحاتی پروگرام کے سلسلے میں وزیراعظم آزادکشمیر افتخار گیلانی کی زیر صدارت اعلیٰ سطح کا اجلاس منعقد ہوا، جس میں قائم مقام صدر طارق فاروق نے خصوصی طور پر شرکت کی۔
اجلاس میں سابق وزیراعظم راجا محمد فاروق حیدر خان،وزرا حکومت کرنل (ر) وقار احمد نور، سردار میر اکبر خان، چوہدری اظہر صادق، ثاقب مجید راجہ، عمیر نعیم، را جہ ریاست اور عبدالرحمان آرائیں نے شرکت کی ،اس کے علاوہ اراکین اسمبلی نورین عارف، سید شوکت علی شاہ، چوہدری محمد رزاق، ساجد اقبال، مریم زما ن، مریم ادریس اور دیگر بھی شریک ہوئے، جبکہ سابق وزرا سردار نجیب نقی، عامر الطاف، چوہدری محمد رشید اور دیگر متعلقہ حکام نے شرکت کی۔
اجلاس میں اس عزم کا اعادہ کیا گیا کہ صدر مسلم لیگ (ن) محمد نواز شریف کے ویژن کے مطابق 100 روزہ اصلاحاتی پروگرام کے ذریعے آزادکشمیر میں ترقی، سہولیات اور عوامی خدمت کے نئے دور کا آغاز کیا جائے گا۔
اجلاس میں حکومت کے 100 روزہ اصلاحاتی و ٹرانسفارمیشن پروگرام کے خدوخال، ترجیحات اور عملی اقدامات سمیت دیگر امور زیر غور آئے،اجلاس میں سیکریٹری پلاننگ اینڈ ڈویلپمنٹ عامر لطیف نے 100 روزہ اصلاحاتی پروگرام کے حوالے سے تفصیلی بریفنگ دی،اصلاحاتی پروگرام میں صحت، تعلیم، نوجوانوں کے لیے مواقع، عوامی سہولیات، انفراسٹرکچر اور ترقیاتی منصوبوں کو خصوصی ترجیح دی گئی ہے۔
وزیراعظم افتخار گیلانی نے اجلاس سے خطاب کرتے ہوئے کہا کہ مسلم لیگ (ن) آزادکشمیر کی حکومت قائد مسلم لیگ (ن) محمد نواز شریف کے وژن کے مطابق عوامی خدمت اور گڈ گورننس کے ایجنڈے کو آگے بڑھائے گی اور عام آدمی کو زیادہ سے زیادہ سہولیات اس کی دہلیز پر فراہم کرنے کے لیے تمام وسائل بروئے کار لائے جائیں گے،100 روزہ اصلاحاتی پروگرام حکومت کی اولین ترجیح ہے۔
وزیراعظم افتخار گیلانی نے کہا کہ وفاق اور پنجاب کے تعاون سے شروع ہونے والے مسلم لیگ (ن) کی حکومت کے 100 روزہ اصلاحاتی پروگرام کے تحت موبائل ہسپتال، گرین بسیں اور دیگر عوامی فلاحی و ترقیاتی منصوبے زمین پر دکھائی دیں گے100 روزہ اصلاحاتی پروگرام کا جلد آغاز کیا جائے گا،حکومت کا مشن عام آدمی کو فاسٹ ٹریک بنیادوں پر سہولیات کی فراہمی، نظام میں بہتری اور ترقیاتی عمل کو تیز تر بنانا ہے۔
انہوں نے کہاکہ 100 روزہ اصلاحاتی پروگرام مسلم لیگ (ن) آزادکشمیر کی حکومت کے ایک نئے دور کا آغاز ہے، جس کے ذریعے عوام کو ان کی دہلیز پر سہولیات کی فراہمی، عام آدمی کے مسائل کے حل اور حکومتی اداروں کی کارکردگی میں بہتری لائی جائے گی، آزادکشمیر میں پنجاب کی طرز پر تیز رفتاری، مؤثر حکمت عملی اور نتیجہ خیز انداز میں ترقیاتی کام آگے بڑھائے جائیں گے حکومت کی توجہ ایسے منصوبوں پر مرکوز ہوگی جن کے براہِ راست اور فوری ثمرات عام شہری تک پہنچ سکیں۔