سندھ اسمبلی میں سرکاری اساتذہ اور دورانِ سروس وفات پانے والے اساتذہ کے خاندانوں کے مالی تحفظ کے لیے جامع گروپ انشورنس اسکیم نافذ کرنے کی قرارداد پیش کردی گئی۔
پیپلز پارٹی کے رکن سندھ اسمبلی سجاد علی سومرو کی جانب سے پیش کی گئی قرارداد میں حکومتِ سندھ سے مطالبہ کیا گیا ہے کہ صوبے کے تمام سرکاری اساتذہ کے لیے فوری طور پر جامع، شفاف اور مؤثر گروپ انشورنس اسکیم کا نفاذ کیا جائے۔
قرارداد میں کہا گیا ہے کہ اس سلسلے میں ضروری قانون سازی مکمل کرنے کے ساتھ باضابطہ نوٹیفکیشن بھی جاری کیا جائے، تاکہ سرکاری اساتذہ کو انشورنس کی سہولت حاصل ہوسکے اور دورانِ سروس کسی استاد کی وفات کی صورت میں اس کے اہلِ خانہ کو مالی مشکلات کا سامنا نہ کرنا پڑے۔
قرارداد کے ذریعے حکومت سے یہ بھی مطالبہ کیا گیا کہ دورانِ سروس وفات پانے والے کسی بھی استاد کے لواحقین کو انشورنس کی رقم بروقت، شفاف اور آسان طریقہ کار کے تحت ادا کرنے کو یقینی بنایا جائے، تاکہ متاثرہ خاندان کو مالی امداد کے حصول کے لیے غیر ضروری مشکلات کا سامنا نہ کرنا پڑے۔
قرارداد پیش کرتے ہوئے مؤقف اختیار کیا گیا کہ اساتذہ قوم کے مستقبل کے معمار ہیں اور نئی نسل کی تعلیم و تربیت میں ان کا بنیادی کردار ہے۔ ایسے میں اساتذہ کے ساتھ ساتھ ان کے خاندانوں کے مستقبل اور مالی تحفظ کو یقینی بنانا بھی حکومت کی بنیادی ذمہ داری ہے۔
رکن سندھ اسمبلی سجاد علی سومرو نے مطالبہ کیا کہ حکومت اساتذہ کے لیے گروپ انشورنس اسکیم کے نفاذ کو ترجیحی بنیادوں پر مکمل کرے اور اس کے لیے ضروری قانونی و انتظامی اقدامات جلد کیے جائیں۔