دور دراز سے کرائے لگا کر آنے والے شہری خوار، پٹواری و افسران غائب، جائز کاموں کیلئے دربدر
سہولیات ایک چھت تلے دینے کا وزیراعلیٰ کا ویژن کہاں؟ شہری کرائے اور وقت گنوا کر خوار، فوری نوٹس کا مطالبہ
گوجرخان (قمرشہزاد) گوجرخان میں لینڈ ریونیو کے مختلف دفاتر میں افسران و اہلکاروں کی مبینہ عدم موجودگی اور بعض دفاتر کو تالے لگے ہونے کے باعث شہریوں کی مشکلات نے سنگین صورت اختیار کر لی ہے۔ دور دراز علاقوں سے بھاری کرائے خرچ کرکے آنے والے سائلین اور خواتین کا بھی کہنا ہے کہ دفتر پہنچتے ہیں تو کہیں دروازے بند، کہیں متعلقہ پٹواری گرداور، نائب تحصیلدار غائب حتی کہ تحصیلدار سے بھی ملاقات نہیں ہو رہی۔ نتیجتاً شہری پیسہ اور پورا دن خرچ کرنے کے باوجود خالی ہاتھ واپس لوٹنے پر مجبور ہیں۔ اس تمام تر صورتحال پر شہریوں کا سوال ہے کہ آخر عوام جائیں تو جائیں کہاں، اپنے جائز کام کیلئے کس کے دروازے پر دستک دیں اور اس اذیت کا ذمہ دار کون ہے؟ رجسٹریوں اور زمین سے متعلق دیگر معاملات کی فیسیں اور سرکاری ریٹ بڑھتے جا رہے ہیں، مگر شہریوں کے مطابق اس کے مقابلے میں بنیادی سہولیات کا فقدان ہے۔ عوام کا کہنا ہے کہ جب سرکاری کام کی مد میں رقم وصول کی جاتی ہے تو پھر بروقت سروس فراہم کرنا بھی اداروں کی ذمہ داری ہونی چاہیے۔ شہری حلقوں کے مطابق یہ صورتحال کسی ایک دن کا معاملہ نہیں، عرصہ سے سائلین مشکلات کا سامنا کر رہے ہیں جبکہ حالیہ اینٹی کرپشن کارروائیوں کے بعد صورتحال مزید تشویش ناک دکھائی دے رہی ہے۔ شہری سوال اٹھا رہے ہیں کہ افسران و اہلکار دفاتر میں موجود کیوں نہیں؟ کیا اس کی وجہ اینٹی کرپشن کے چھاپوں کا خوف ہے یا کوئی اور انتظامی سبب؟ اگر اہلکار فیلڈ ڈیوٹی یا کسی سرکاری ذمہ داری پر ہیں تو عوام کو واضح طور پر آگاہ کیوں نہیں کیا جاتا؟ دوسری جانب آراضی ریکارڈ سینٹر میں بھی عملے کی کمی، طویل انتظار اور نمبر لگانے کے باوجود فہرست یا ترتیب تبدیل ہونے کی مبینہ شکایات نے سائلین کی پریشانی بڑھا دی ہے۔ شہریوں کا کہنا ہے کہ پیسہ خرچ کرکے بھی اگر عوام کو اپنے جائز کام کیلئے خوار ہونا پڑے تو پھر سہولت اور نظام کا فائدہ کس کو پہنچ رہا ہے؟ شہریوں نے وزیراعلیٰ پنجاب کمشنر راولپنڈی اور متعلقہ اعلیٰ حکام سے فوری نوٹس لینے، لینڈ ریونیو دفاتر میں افسران و اہلکاروں کی حاضری یقینی بنانے، سائلین کے زیرالتوا کام بلا تاخیر نمٹانے اور عوام کو درپیش مشکلات کا فوری ازالہ کرنے کا مطالبہ کیا ہے۔
اینٹی کرپشن کے چھاپوں کا خوف یا انتظامی وجوہات؟ گوجرخان میں لینڈ ریونیو دفاتر ویران
