سلمان خان کی درخواست پر فلم ‘کالا ہرن’ کیخلاف عدالت کا نوٹس جاری

نئی دہلی: بالی ووڈ سپر اسٹار سلمان خان کی جانب سے فلم ’کالا ہرن: دی بیٹل فار لیگیسی‘ کی نمائش روکنے کے لیے دائر درخواست پر دہلی ہائی کورٹ میں سماعت ہوئی، جہاں عدالت نے فلم کے پروڈیوسر امت جانی اور دیگر متعلقہ فریقین کو نوٹس جاری کرتے ہوئے جواب طلب کر لیا۔ عدالت نے مقدمے کی آئندہ سماعت 19 جون کو مقرر کر دی ہے۔

یہ سماعت جسٹس نینا بنسل کرشنا کی سربراہی میں قائم واحد رکنی بینچ کے روبرو ہوئی۔ دورانِ سماعت سلمان خان کے وکیل، سینئر ایڈووکیٹ نظام پاشا نے مؤقف اختیار کیا کہ اداکار کے پرسنالٹی رائٹس پہلے ہی دہلی ہائی کورٹ کے فیصلے کے تحت محفوظ قرار دیے جا چکے ہیں، جن میں ان کی شناخت، شبیہ، ظاہری انداز اور دیگر شخصی خصوصیات شامل ہیں۔سلمان خان کی قانونی ٹیم نے عدالت کو بتایا کہ 29 مئی کو فلم کا ایک پوسٹر جاری کیا گیا تھا، جس میں ایک کردار کو سلمان خان سے مشابہ انداز میں پیش کیا گیا۔ وکیل کے مطابق مذکورہ کردار نے وہ مخصوص بریسلٹ بھی پہن رکھا ہے جو سلمان خان کی شناخت کا حصہ سمجھا جاتا ہے۔ درخواست گزار کا الزام ہے کہ فلم کی تشہیری مہم میں ان کی شناخت اور عوامی شہرت کو بغیر اجازت استعمال کیا جا رہا ہے۔

عدالت میں یہ نکتہ بھی اٹھایا گیا کہ 1998 کے مشہور کالا ہرن شکار کیس سے متعلق چار مقدمات میں سے تین میں سلمان خان کو ریلیف مل چکا ہے، جبکہ ایک مقدمہ اب بھی اپیل کے مرحلے میں زیر التوا ہے۔ وکیل کا کہنا تھا کہ فلم اور اس کے تشہیری مواد کے ذریعے اداکار کا نام مسلسل ایک متنازع مقدمے سے جوڑا جا رہا ہے، جس سے ان کی ساکھ اور عوامی امیج متاثر ہو رہا ہے۔درخواست میں پروڈیوسر امت جانی، جانی فائر فاکس فلمز، ہدایت کار بھارت ایس شرینیت، اکشے پانڈے اور دیگر متعلقہ افراد کو فریق بنایا گیا ہے۔ سلمان خان نے عدالت سے استدعا کی ہے کہ فلم کی تیاری، تشہیر، تقسیم اور نمائش پر فوری پابندی عائد کی جائے۔درخواست گزار کے مطابق فلم کے پوسٹرز اور دیگر پروموشنل مواد ان کے پرسنالٹی رائٹس کی خلاف ورزی کے مترادف ہیں اور ان کی شناخت کو تجارتی مقاصد کے لیے استعمال کیا جا رہا ہے، جو قانونی طور پر قابل اعتراض ہے۔

واضح رہے کہ ’کالا ہرن: دی بیٹل فار لیگیسی‘ کو 1998 کے معروف کالا ہرن شکار مقدمے اور اس سے جڑے واقعات پر مبنی قرار دیا جا رہا ہے۔ حال ہی میں فلم کا فرسٹ لک اور ٹریلر بھی جاری کیا گیا تھا۔ سلمان خان کی قانونی ٹیم اس سے قبل فلم سازوں کو قانونی نوٹس بھی بھجوا چکی ہے، جبکہ اب یہ معاملہ دہلی ہائی کورٹ میں زیر غور ہے۔ عدالت 19 جون کو کیس کی مزید سماعت کرے گی۔