اوکاڑہ (نامہ نگار ملک ظفر)ڈپٹی کمشنر احمد عثمان جاوید کی ہدایت پر ضلع بھر میں ایل پی جی مافیا اور گیس کی اوور چارجنگ کے خلاف بھرپور کریک ڈاؤن جاری ہے۔ سول ڈیفنس آفیسر جاوید اختر کھچی کی زیر نگرانی کارروائیوں کے دوران سرکاری نرخوں سے زائد قیمت پر گیس فروخت کرنے پر مجموعی طور پر 25 دکانیں سیل کر دی گئیں، 11 مقدمات درج کیے گئے جبکہ خلاف ورزی کے مرتکب افراد کو 20 ہزار روپے جرمانہ بھی عائد کیا گیا۔
تفصیلات کے مطابق کارروائیوں کے دوران اوکاڑہ شہر میں 7، شیرگڑھ میں 2، حجرہ شاہ مقیم میں 3، بصیر پور میں 5 اور حویلی لکھا میں 8 دکانیں سیل کی گئیں۔ سول ڈیفنس کی ٹیمیں ضلع بھر میں مسلسل فیلڈ چیکنگ کر رہی ہیں تاکہ صارفین کو سرکاری نرخوں پر ایل پی جی کی فراہمی یقینی بنائی جا سکے۔
سول ڈیفنس آفیسر جاوید اختر کھچی نے کہا کہ گیس مہنگے داموں فروخت کر کے عوام کا استحصال کرنے والے دکاندار فوری طور پر اپنی روش ترک کریں، کیونکہ سرکاری ریٹس سے تجاوز کرنے والوں کے ساتھ کسی قسم کی رعایت نہیں برتی جائے گی۔ انہوں نے شہریوں سے بھی اپیل کی کہ وہ اوور چارجنگ کرنے والے دکانداروں کی نشاندہی کریں تاکہ ان کے خلاف فوری اور سخت قانونی کارروائی عمل میں لائی جا سکے۔
انہوں نے مزید کہا کہ ضلع بھر میں گیس کی اوور چارجنگ کے مکمل خاتمے تک کریک ڈاؤن بلا تعطل جاری رہے گا اور قانون کی خلاف ورزی کرنے والے عناصر کے خلاف سخت کارروائیاں جاری رکھی جائیں گی۔