بلوچستان کے ضلع ہرنائی میں کوئلے کی کان میں گیس بھر جانے کے باعث ہونے والے خوفناک دھماکے کے بعد پاک فوج نے ریسکیو آپریشن مکمل کرلیا۔ کان کے اندر پھنسنے والے 5 مزدوروں کو طویل جدوجہد کے بعد بحفاظت زندہ باہر نکال لیا گیا۔
حادثہ کوئلے کی کان میں گیس بھر جانے کے باعث پیش آیا، جس کے نتیجے میں کان کے اندر موجود متعدد مزدور گہرائی میں پھنس گئے۔ واقعے کی اطلاع ملتے ہی پاک فوج کی ریسکیو ٹیمیں فوری طور پر جائے حادثہ پر پہنچیں اور پھنسے ہوئے مزدوروں کو نکالنے کے لیے ریسکیو آپریشن شروع کیا۔
پاک فوج کی ریسکیو ٹیموں نے طویل اور مشکل جدوجہد کے بعد کان کے اندر پھنسے 5 مزدوروں کو بحفاظت باہر نکال لیا۔ حادثے میں 4 کان کن جاں بحق ہوگئے، جبکہ 5 مزدور زخمی ہوئے ہیں۔
زخمی مزدوروں کو طبی امداد کے لیے کوئٹہ منتقل کردیا گیا ہے، جبکہ پاک فوج کی جانب سے ریسکیو آپریشن مکمل کرلیا گیا ہے۔