کراچی میں وفاقی اردو یونیورسٹی کے گلشن اقبال کیمپس کے کیمپس افسر عدنان اختر پر نامعلوم مسلح افراد نے فائرنگ کر دی، جس کے نتیجے میں وہ شدید زخمی ہو گئے۔ پولیس نے واقعے کی مختلف پہلوؤں سے تحقیقات شروع کر دی ہیں جبکہ حملہ آوروں کی تلاش جاری ہے۔
پولیس کے مطابق واقعہ عزیز بھٹی پارک کے قریب پیش آیا، جہاں موٹر سائیکل پر سوار دو نامعلوم ملزمان نے، جنہوں نے ہیلمٹ اور ماسک پہن رکھے تھے، عدنان اختر کو اس وقت نشانہ بنایا جب وہ اپنے گھر سے یونیورسٹی جانے کے لیے روانہ ہوئے تھے۔
ابتدائی معلومات کے مطابق حملہ آوروں نے پیچھے سے اندھا دھند فائرنگ کی اور واردات کے فوراً بعد موقع سے فرار ہو گئے۔ فائرنگ کے نتیجے میں عدنان اختر کو چار گولیاں لگیں، جس سے وہ شدید زخمی ہو گئے۔
زخمی کیمپس افسر کو فوری طور پر اسٹیڈیم روڈ پر واقع ایک نجی اسپتال منتقل کیا گیا، جہاں انہیں طبی امداد فراہم کی جا رہی ہے۔ پولیس کا کہنا ہے کہ ڈاکٹرز کے مطابق عدنان اختر کی حالت خطرے سے باہر ہے۔
قانون نافذ کرنے والے اداروں نے جائے وقوعہ سے شواہد اکٹھے کر لیے ہیں جبکہ اطراف میں نصب سی سی ٹی وی کیمروں کی فوٹیج بھی حاصل کی جا رہی ہے تاکہ حملہ آوروں کی شناخت ممکن بنائی جا سکے۔
پولیس حکام کے مطابق واقعے کی مختلف زاویوں سے تحقیقات جاری ہیں، جن میں ذاتی دشمنی، پیشہ ورانہ معاملات اور دیگر ممکنہ محرکات کا بھی جائزہ لیا جا رہا ہے۔ تفتیش مکمل ہونے کے بعد ہی حملے کی اصل وجہ کے بارے میں حتمی طور پر کچھ کہا جا سکے گا۔
حکام نے یقین دہانی کرائی ہے کہ واقعے میں ملوث افراد کو جلد گرفتار کرکے قانون کے مطابق کارروائی عمل میں لائی جائے گی۔