ملک میں ایک ہفتے کے دوران اشیائے خورونوش کی قیمتوں میں ملا جلا رجحان دیکھنے میں آیا، جہاں بعض ضروری اشیاء کی قیمتوں میں اضافہ ریکارڈ کیا گیا، جبکہ کئی اشیاء کی قیمتوں میں کمی بھی سامنے آئی۔ ادارہ شماریات کی ہفتہ وار رپورٹ کے مطابق آلو، پیاز، مرغی کا گوشت اور آٹے سمیت متعدد اشیاء مہنگی ہوئیں، جبکہ ٹماٹر، ایل پی جی، دال مونگ، پیٹرول اور ڈیزل کی قیمتوں میں کمی دیکھی گئی۔
رپورٹ کے مطابق ایک ہفتے کے دوران آلو کی قیمت میں 3.94 فیصد، مرغی کے گوشت میں 3.70 فیصد اور پیاز کی قیمت میں 3.54 فیصد اضافہ ہوا۔ اسی طرح گندم کا آٹا 1.61 فیصد، انڈے 0.81 فیصد، بڑا گوشت 0.59 فیصد، تازہ دودھ 0.50 فیصد اور واشنگ صابن 0.44 فیصد مہنگا ہوا۔دوسری جانب ٹماٹر کی فی کلو قیمت میں سب سے زیادہ 23.30 فیصد کمی ریکارڈ کی گئی، جبکہ گھریلو ایل پی جی سلنڈر 15.12 فیصد سستا ہوا۔ دال مونگ کی قیمت میں 2.15 فیصد، پیٹرول میں 0.69 فیصد، ڈیزل میں 0.63 فیصد، دال مسور میں 0.52 فیصد اور چینی کی قیمت میں 0.07 فیصد کمی ریکارڈ کی گئی۔
ادارہ شماریات کی رپورٹ کے مطابق سالانہ بنیادوں پر کئی ضروری اشیاء کی قیمتوں میں نمایاں اضافہ بھی برقرار ہے۔ ٹماٹر کی قیمت گزشتہ سال کے مقابلے میں 129.01 فیصد، پیاز 76.34 فیصد اور گندم کے آٹے کی قیمت 71.22 فیصد بڑھ چکی ہے۔رپورٹ میں بتایا گیا کہ بجلی کے پہلی سہ ماہی کے چارجز میں سالانہ بنیاد پر 49.14 فیصد جبکہ گیس کے چارجز میں 29.85 فیصد اضافہ ہوا۔ اسی طرح ایل پی جی کی قیمت بھی سالانہ بنیاد پر 25.51 فیصد زیادہ رہی۔
تاہم بعض اشیاء گزشتہ سال کے مقابلے میں نمایاں سستی بھی ہوئیں۔ آلو 35.89 فیصد، چنے کی دال 22.23 فیصد، مرغی کا گوشت 21.32 فیصد، چینی 20.98 فیصد، نمک 14.09 فیصد، دال مسور 12.93 فیصد اور انڈے 9.23 فیصد سستے ریکارڈ کیے گئے۔ادارہ شماریات کے مطابق حالیہ اعداد و شمار سے ظاہر ہوتا ہے کہ مہنگائی کے مجموعی رجحان میں اگرچہ بعض اشیاء کی قیمتوں میں کمی آئی ہے، تاہم متعدد بنیادی ضروریات کی قیمتیں اب بھی بلند سطح پر برقرار ہیں، جس کے باعث صارفین پر مہنگائی کا دباؤ بدستور موجود ہے۔