گھوٹکی ( باغی ٹی وی / نامہ نگار مشتاق علی لغاری) گھوٹکی پولیس نے سابق ایس ایچ او قابل بھیو اور احاطہ عدالت میں پیش آنے والے واقعے سے متعلق وضاحت جاری کرتے ہوئے کہا ہے کہ پولیس آئین، قانون اور میرٹ کے مطابق اپنے فرائض انجام دے رہی ہے، جبکہ پولیس کے خلاف عائد دیگر الزامات بے بنیاد ہیں۔
گھوٹکی پولیس کے مطابق قانون کی نظر میں تمام افراد برابر ہیں اور عدالتی احکامات و فیصلوں پر مکمل عمل درآمد یقینی بنایا جائے گا۔پولیس کا کہنا ہے کہ سابق ایس ایچ او قابل بھیو کے خلاف عائد الزامات پر قانون کے مطابق کارروائی کی گئی ہے، جبکہ احاطہ عدالت میں ان پر مبینہ حملے اور تشدد کے واقعے کا مقدمہ بھی قانونی تقاضوں کے مطابق درج کیا گیا ہے۔پولیس کے مطابق ایس ایس پی گھوٹکی محمد انور کھیتران کی ہدایت پر معاملے کی شفاف اور غیر جانب دارانہ انکوائری بھی جاری ہے۔ انکوائری کے دوران کسی بے گناہ شخص کے ساتھ زیادتی نہیں ہونے دی جائے گی۔ پولیس کا کہنا ہے کہ جو شخص بے گناہ ثابت ہوا، اس کا نام مقدمے سے خارج کیا جائے گا، جبکہ ذمہ دار افراد کے خلاف قانون کے مطابق کارروائی عمل میں لائی جائے گی۔
گھوٹکی پولیس نے عوام اور صحافتی برادری سے اپیل کی ہے کہ غیر مصدقہ اطلاعات اور افواہوں سے گریز کیا جائے اور کسی بھی خبر کی اشاعت یا نشر کرنے سے قبل حقائق کی مکمل تصدیق کی جائے۔