گوجرخان (قمر شہزاد) وفاقی تحقیقاتی ادارے ایف آئی اے کے اینٹی ہیومن ٹریفکنگ سرکل لاہور نے ایک بڑی کارروائی کرتے ہوئے گوجرخان کے رہائشی ڈاکٹر جوڑے کو، جو انسانی اسمگلنگ اور کروڑوں روپے کے فراڈ میں ملوث پائے گئے، بیرون ملک فرار ہونے کی کوشش کے دوران اسلام آباد ایئرپورٹ سے گرفتار کر لیا۔ ملزمان ڈاکٹر راجہ زاہد حسین اور ان کی اہلیہ ڈاکٹر ص زاہد، جو شہر میں زارا میڈیکل سنٹر کے نام سے ہسپتال چلاتے تھے، نے مسیحائی کے لبادے میں شہریوں کو لوٹنے کا گھناؤنا کاروبار سجا رکھا تھا۔ ایف آئی اے کی انکوائری نمبر 3368/2025 میں ہوش ربا انکشافات سامنے آئے ہیں۔
تفصیلات کے مطابق، ان سفید پوش نوسربازوں نے مدعی محمد ایوب خان سکنہ گلبرگ لاھور اور ان کے ساتھیوں سمیت کل 10 افراد کو پرتگال میں سیٹل کروانے اور وہاں پرکشش ملازمتیں دلوانے کا جھانسہ دیا۔ ملزمان نے مکاری کا جال پھیلاتے ہوئے متاثرہ خاندانوں سے بینک اکاؤنٹس اور نقد رقم کی صورت میں مجموعی طور پر 13 کروڑ 26 لاکھ روپے بٹورے تھے۔ رقم ہضم کرنے کے بعد جب ملزمان نے نہ تو متاثرین کو بیرون ملک بھیجا اور نہ ہی رقم واپس کی، تو ایف آئی اے نے تحقیقات کا آغاز کیا۔ ابتدائی انکوائری میں جرم ثابت ہونے پر ایمیگریشن آرڈیننس 1979 کی دفعہ 17/22 کے تحت مقدمہ نمبر 275/26 درج کیا گیا۔ ملزمان کے نام ایگزٹ کنٹرول لسٹ میں شامل کر دیے گئے تھے۔ جیسے ہی ان اشتہاری ملزمان نے اسلام آباد ایئرپورٹ سے قانون کی آنکھوں میں دھول جھونک کر فرار ہونے کی کوشش کی تو ایف آئی اے حکام نے انہیں دھر لیا۔ عوامی حلقوں نے ایف آئی اے کی اس بروقت کارروائی کو سراہتے ہوئے مطالبہ کیا ہے کہ ایسے لٹیروں کو نشانِ عبرت بنایا جائے تاکہ آئندہ کوئی بھی شہریوں کی مجبوریوں کا سودا نہ کر سکے۔