حماس نے غزہ میں اپنی حکومت ختم کرنے کا اعلان کردیا، انتظام فلسطینی ٹیکنو کریٹ کمیٹی کے حوالے کرنے پر رضا مندی ظاہر کردی۔
حماس نے غزہ میں 20 سال بعد گورننگ باڈی کو تحلیل کردیا، حماس نے غزہ کا انتظام فلسطینی ٹیکنوکریٹ کمیٹی کے حوالے کرنے کا اعلان کردیا۔فلسطینی ٹیکنو کریٹ کمیٹی کا انتظام سنبھالنے تک حماس نگران کے طور پر کام کرے گی، ٹیکنوکریٹ کمیٹی امریکی صدر کے بورڈ آف پیس کی حمایت پر بنائی گئی تھی۔ترجمان حماس کے مطابق جنگ بندی کے بعد غزہ کے انتظامی ڈھانچے کا حصہ بننے کی خواہش نہیں، حماس نے اپنا کام مکمل کر دیا، ثالث معاہدے پر عملدرآمد یقینی بنائیں، گیند اب ثالثی کرنیوالے ممالک کے کورٹ میں ہے۔
غزہ کی ایمرجنسی کمیٹی کے سربراہ محمد الفرا نے باضابطہ طور پر استعفیٰ جمع کرادیا ہے، غزہ کے انتظام کے لیے قومی کمیٹی کی طرف منتقلی ممکن ہو سکے،حماس عہدیدار کا اس حوالے سے کہنا ہے کہ اب شہری حکمرانی کے لیے ایک ٹیکنوکریٹ کمیٹی کی راہ ہموار ہو گئی ہے، اب معاملہ ثالثوں کے ہاتھ میں ہے،حماس ترجمان کے مطابق حماس نے اپنی ذمہ داری پوری کردی ہے، معاہدے کے ضامن ممالک اور امریکی انتظامیہ کی ذمہ داری ہےکہ وہ اس معاہدے پر عمل درآمد کرائیں، ثالث قومی کمیٹی کو علاقے میں داخل ہونے کی اجازت دلوانے کے لیے فریقین پر زور ڈالیں۔