امریکا، میکسیکو اور کینیڈا کی مشترکہ میزبانی میں ہونے والے فیفا ورلڈ کپ 2026 میں صرف عالمی چیمپئن کا فیصلہ ہی نہیں ہوگا بلکہ فٹبال کی تاریخ کے کئی بڑے ریکارڈز بھی خطرے میں ہوں گے۔ دنیا بھر کے شائقین کی نظریں ایک بار پھر سپر اسٹارز لیونل میسی، کرسٹیانو رونالڈو اور کالیان ایمباپے سمیت کئی نامور کھلاڑیوں پر مرکوز ہوں گی جو نئے سنگ میل عبور کرنے کے قریب ہیں۔
ارجنٹائن کے لیونل میسی اور پرتگال کے کرسٹیانو رونالڈو اگر ٹورنامنٹ میں شرکت کرتے ہیں تو وہ اپنے کیریئر کا چھٹا ورلڈ کپ کھیلیں گے۔ یوں دونوں فٹبالرز تاریخ میں پہلی مرتبہ چھ مختلف ورلڈ کپ ایڈیشنز میں شرکت کرنے والے کھلاڑی بن جائیں گے، جو ایک منفرد عالمی ریکارڈ ہوگا۔
لیونل میسی پہلے ہی ورلڈ کپ میں سب سے زیادہ 26 میچز کھیلنے، سب سے زیادہ 2314 منٹس میدان میں گزارنے اور بطور کپتان سب سے زیادہ میچز کھیلنے کا اعزاز رکھتے ہیں۔ 2026 کے ایونٹ میں وہ ان ریکارڈز کو مزید بہتر بنا سکتے ہیں۔
دوسری جانب کرسٹیانو رونالڈو ایک تاریخی اعزاز کے قریب ہیں۔ اگر وہ ٹورنامنٹ میں کم از کم ایک گول کرنے میں کامیاب ہو جاتے ہیں تو وہ چھ مختلف ورلڈ کپ مقابلوں میں گول کرنے والے دنیا کے پہلے فٹبالر بن جائیں گے۔
ورلڈ کپ کی تاریخ میں سب سے زیادہ 16 گولز کا ریکارڈ جرمنی کے میروسلاو کلوزے کے پاس ہے۔ لیونل میسی 13 جبکہ فرانس کے کالیان ایمباپے 12 گولز کے ساتھ اس ریکارڈ کے تعاقب میں ہیں۔ ماہرین کے مطابق ایمباپے اس ریکارڈ کو توڑنے کے مضبوط امیدواروں میں شامل ہیں۔
فرانس کے نوجوان اسٹار کالیان ایمباپے ایک اور منفرد کارنامہ بھی انجام دے سکتے ہیں۔ اگر فرانس مسلسل تیسری بار فائنل تک پہنچتا ہے اور ایمباپے فائنل میں گول کرتے ہیں تو وہ تین مختلف ورلڈ کپ فائنلز میں گول کرنے والے پہلے کھلاڑی بن جائیں گے۔
ٹیموں کے حوالے سے دفاعی چیمپئن ارجنٹائن کے پاس بھی تاریخ رقم کرنے کا سنہری موقع ہے۔ اگر وہ اپنا عالمی ٹائٹل برقرار رکھنے میں کامیاب رہتا ہے تو 1962 کے بعد پہلی بار کوئی ٹیم مسلسل دو ورلڈ کپ جیتے گی۔ اس کے ساتھ ارجنٹائن اٹلی اور برازیل کے بعد یہ اعزاز حاصل کرنے والی تیسری ٹیم بن جائے گی۔
برازیل بھی اپنے عالمی ریکارڈ کو مزید مضبوط بنا سکتا ہے۔ اگر برازیل چھٹی بار ورلڈ کپ جیت لیتا ہے تو وہ اپنے ہی قائم کردہ پانچ ٹائٹلز کے ریکارڈ کو بہتر بناتے ہوئے چھ عالمی اعزازات حاصل کرنے والی پہلی ٹیم بن جائے گی۔
جرمنی، فرانس، انگلینڈ اور یوروگوئے بھی مختلف تاریخی سنگ میل حاصل کرنے کی دوڑ میں شامل ہیں، جس سے ورلڈ کپ 2026 شائقین کے لیے مزید دلچسپ اور یادگار بننے جا رہا ہے۔
فیفا ورلڈ کپ 2026 میں کئی تاریخی ریکارڈز ٹوٹنے کا امکان
