روسی خبر ایجنسی نے دعویٰ کیا ہے کہ ایران نے آبنائے ہرمز سے گزرنے کی کوشش کرنے والے ایک امریکی جہاز کو وارننگ شاٹس فائر کر کے واپس جانے پر مجبور کر دیا۔
رپورٹ کے مطابق امریکی آئل ٹینکر نے آبنائے ہرمز سے گزرنے کی کوشش کی، تاہم ایرانی پاسدارانِ انقلاب نے فوری ردعمل دیتے ہوئے فائرنگ کی وارننگ جاری کی۔
روسی خبر ایجنسی کے مطابق وارننگ شاٹس کے بعد امریکی جہاز نے اپنا راستہ تبدیل کرتے ہوئے واپس جانے کو ترجیح دی۔
رپورٹ میں مزید کہا گیا کہ امریکا نے بعد ازاں بندر عباس کے قریب کارروائی بھی کی، تاہم اس حملے میں کسی قسم کا جانی یا مالی نقصان نہیں ہوا۔
ایرانی حکام کی جانب سے اس واقعے پر مکمل تفصیلات جاری نہیں کی گئیں جبکہ امریکی حکام کی طرف سے بھی فوری ردعمل سامنے نہیں آیا۔
تجزیہ کاروں کے مطابق آبنائے ہرمز اس وقت ایران اور امریکا کے درمیان کشیدگی کا سب سے حساس مرکز بن چکی ہے۔
ماہرین کا کہنا ہے کہ دنیا کی بڑی مقدار میں تیل اسی اہم آبی گزرگاہ سے گزرتا ہے، اس لیے وہاں کسی بھی قسم کی فوجی کشیدگی عالمی معیشت اور تیل کی قیمتوں پر فوری اثر ڈال سکتی ہے۔
حالیہ ہفتوں میں ایران، امریکا اور اسرائیل کے درمیان بڑھتی ہوئی کشیدگی کے باعث خلیجی خطے میں فوجی سرگرمیوں میں نمایاں اضافہ دیکھا جا رہا ہے۔
سیاسی مبصرین کے مطابق موجودہ صورتحال میں کسی بھی غلط اندازے یا محدود فوجی کارروائی سے خطے میں بڑے تصادم کا خطرہ بڑھ سکتا ہے۔
عالمی برادری مسلسل سفارتی حل اور کشیدگی میں کمی پر زور دے رہی ہے تاکہ مشرق وسطیٰ میں صورتحال مزید خراب نہ ہو۔
ایران نے امریکی جہاز کو آبنائے ہرمز سے واپس جانے پر مجبور کر دیا
