امریکا اور ایران کے درمیان بڑھتی ہوئی کشیدگی کے تناظر میں اسرائیل نے ممکنہ نئی جنگ کی تیاریوں کا آغاز کر دیا، جبکہ امریکی صدر ڈونلڈ ٹرمپ نے ایران کو معاہدے کے لیے صرف چند دن کی مہلت دیتے ہوئے دوبارہ فوجی کارروائی کی دھمکی دے دی ہے۔
اسرائیلی ٹی وی رپورٹ کے مطابق وزیرِ اعظم نیتن یاہو نے ایک اعلیٰ سطحی سیکیورٹی اجلاس طلب کیا، جس میں فوج اور فضائیہ کے سربراہان سمیت اہم دفاعی حکام نے شرکت کی۔ اجلاس میں ایران پر ممکنہ امریکی حملے کی صورت میں اسرائیلی تیاریوں اور دفاعی حکمتِ عملی کا تفصیلی جائزہ لیا گیا۔رپورٹ میں بتایا گیا کہ نیتن یاہو نے بدھ کے روز اپنی عدالتی پیشی منسوخ کر دی، جبکہ اسرائیلی صدر ے خطے کی حساس صورتِ حال کے باعث نیویارک کا دورہ ملتوی کر دیا۔
دوسری جانب امریکی صدر ڈونلڈ ٹرمپ نے اپنے تازہ بیان میں کہا ہے کہ ایران کو 2 سے 3 دن کی مزید مہلت دی جا رہی ہے، اگر معاہدہ نہ ہوا تو امریکا ایک اور بڑا حملہ کر سکتا ہے۔ ٹرمپ نے دعویٰ کیا کہ ایران ایٹمی ہتھیار حاصل کر کے پہلے اسرائیل اور بعد ازاں خلیجی ممالک کو نشانہ بنا سکتا ہے۔
ادھر ایرانی حکام نے واضح کیا ہے کہ تہران جنگ بندی کے بدلے امریکا سے اقتصادی پابندیاں ختم کرنے، منجمد اثاثے بحال کرنے اور خطے سے امریکی افواج کے انخلاء کا مطالبہ کرتا ہے۔ ایرانی قیادت کا کہنا ہے کہ ایران اپنی یورینیئم افزودگی روکنے کے لیے تیار نہیں۔اسی دوران امریکی وزارتِ خزانہ نے ایران کے خلاف نئی پابندیاں عائد کرتے ہوئے متعدد کمپنیوں، بحری جہازوں اور مالیاتی نیٹ ورکس کو نشانہ بنایا ہے، جبکہ امریکا نے ایک ایرانی تیل بردار جہاز بھی قبضے میں لے لیا۔
ایرانی وزیرِ خارجہ عباس عراقچی نے خبردار کیا ہےکہ اگر امریکا نے دوبارہ جارحیت شروع کی تو ایران اس سے بھی زیادہ “حیرت انگیز ردعمل” دے گا۔دریں اثنا امریکی فوجی حکام نے کہا ہے کہ جنگ کے آغاز میں ایران کے ایک اسکول پر ہونے والے حملے کی تحقیقات جاری ہیں، جہاں 168 بچوں کی ہلاکت کی اطلاعات سامنے آئی تھیں۔