ایران کے وزیر خارجہ عباس عراقچی نے حالیہ کشیدگی کے تناظر میں سخت مؤقف اختیار کرتے ہوئے کہا ہے کہ ایرانی بندرگاہوں کی ناکہ بندی کھلی جارحیت ہے اور اسے جنگ کے مترادف سمجھا جائے گا۔ انہوں نے اپنے بیان میں کہا کہ اس طرح کے اقدامات نہ صرف بین الاقوامی قوانین بلکہ جاری جنگ بندی کی بھی واضح خلاف ورزی ہیں۔
ایرانی وزیر خارجہ نے مزید کہا کہ کسی تجارتی جہاز کو نشانہ بنانا اور اس کے عملے کو یرغمال بنانا انتہائی سنگین اقدام ہے، جو عالمی اصولوں کے خلاف ہے۔ ان کا کہنا تھا کہ ایسے واقعات خطے میں کشیدگی کو مزید بڑھا سکتے ہیں اور عالمی برادری کو اس کا نوٹس لینا چاہیے۔
عباس عراقچی نے واضح کیا کہ ایران اپنے مفادات کے تحفظ کے لیے مکمل صلاحیت رکھتا ہے اور کسی بھی دباؤ کو قبول نہیں کرے گا۔ انہوں نے کہا کہ ایران کو بخوبی علم ہے کہ پابندیوں کا مقابلہ کیسے کرنا ہے، اپنے قومی مفادات کا دفاع کیسے کرنا ہے اور کسی بھی قسم کی دھونس کے سامنے کیسے کھڑا ہونا ہے۔
یہ بیان ایسے وقت سامنے آیا ہے جب ایران اور امریکا کے درمیان جنگ بندی اپنے اختتام کے قریب ہے اور دونوں ممالک کے درمیان مذاکرات کے حوالے سے غیر یقینی صورتحال برقرار ہے۔ ماہرین کا کہنا ہے کہ اگر کشیدگی میں کمی نہ آئی تو خطے میں مزید عدم استحکام پیدا ہو سکتا ہے۔
دوسری جانب عالمی سطح پر سمندری تجارت کے تحفظ کے حوالے سے بھی خدشات بڑھ رہے ہیں، خاص طور پر اہم بحری راستوں میں سیکیورٹی کے مسائل نے کئی ممالک کو تشویش میں مبتلا کر دیا ہے۔ پاکستان سمیت مختلف ممالک سفارتی سطح پر کشیدگی کم کرنے کے لیے کوششیں جاری رکھے ہوئے ہیں تاکہ مذاکرات کا عمل بحال ہو سکے۔