لبنان کے دارالحکومت بیروت میں اسرائیلی فضائی حملوں کے نتیجے میں کم از کم دو افراد شہید جبکہ چار افراد زخمی ہو گئے۔ یہ حملہ ایسے وقت میں کیا گیا ہے جب خطے میں کشیدگی کم کرنے اور امریکا و ایران کے درمیان ممکنہ معاہدے کی خبریں گردش کر رہی ہیں۔
لبنانی میڈیا کے مطابق اسرائیلی حملہ بیروت کے جنوبی علاقے میں ایک عمارت کو نشانہ بنا کر کیا گیا۔ حملے کے بعد علاقے میں شدید دھماکوں کی آوازیں سنی گئیں اور امدادی ٹیمیں فوری طور پر جائے وقوعہ پر پہنچ گئیں۔ زخمیوں کو قریبی اسپتالوں میں منتقل کیا گیا جہاں بعض کی حالت تشویشناک بتائی جا رہی ہے۔
دوسری جانب اسرائیلی میڈیا کا کہنا ہے کہ اسرائیلی فضائیہ کے دو جنگی طیاروں نے بیروت کے جنوبی حصے پر چار گائیڈڈ میزائل داغے۔ اسرائیلی ذرائع کے مطابق یہ کارروائی سیکیورٹی خدشات اور حزب اللہ کی ممکنہ سرگرمیوں کے تناظر میں کی گئی۔
اسرائیلی حکام نے لبنان سے ممکنہ جوابی حملوں کے خدشے کے پیش نظر شمالی اسرائیل اور دیگر حساس علاقوں میں خطرے کی سطح بڑھا دی ہے۔ شہریوں کو ہنگامی صورتحال سے نمٹنے کے لیے تیار رہنے اور حفاظتی ہدایات پر عمل کرنے کی ہدایت بھی جاری کی گئی ہے۔
یہ حملہ ایسے موقع پر سامنے آیا ہے جب امریکا اور ایران کے درمیان جاری سفارتی رابطوں میں پیش رفت کی اطلاعات موصول ہو رہی ہیں اور دونوں ممالک جنگ کے خاتمے سے متعلق ایک ممکنہ معاہدے کے قریب بتائے جا رہے ہیں۔ خطے کے مبصرین کا کہنا ہے کہ لبنان میں بڑھتی ہوئی کشیدگی ان سفارتی کوششوں پر اثر انداز ہو سکتی ہے۔
ایران کی جانب سے حالیہ بیانات میں کہا گیا ہے کہ موجودہ مرحلے میں اولین ترجیح خطے کے تمام محاذوں پر جنگ اور تصادم کا خاتمہ ہے، جس میں لبنان کی صورتحال بھی شامل ہے۔ تجزیہ کاروں کے مطابق اگر خطے میں کشیدگی برقرار رہی تو امن کوششوں کو مزید چیلنجز کا سامنا کرنا پڑ سکتا ہے۔
حملے کے بعد بیروت میں خوف و ہراس کی فضا دیکھی جا رہی ہے جبکہ مقامی حکام نقصانات کا جائزہ لینے اور متاثرہ افراد کو امداد فراہم کرنے میں مصروف ہیں۔
بیروت پر اسرائیلی حملہ، 2 افراد شہید
