مقبوضہ بیت المقدس سے شمالی اسرائیل جانے والے اسرائیلی صدر اسحاق ہرزوگ کے ہیلی کاپٹر کو دورانِ پرواز ایک غیر معمولی صورتحال کا سامنا کرنا پڑا، جب ایک پرندہ ہیلی کاپٹر سے ٹکرا گیا، جس کے باعث پائلٹ کو احتیاطی طور پر ہنگامی لینڈنگ کرنا پڑی۔
اسرائیلی میڈیا کے مطابق واقعہ اس وقت پیش آیا جب صدر اسحاق ہرزوگ سرکاری دورے پر شمالی اسرائیل جا رہے تھے۔ پرندہ ہیلی کاپٹر سے ٹکرانے کے بعد فضائی عملے نے حفاظتی اقدامات کے تحت فوری طور پر قریبی مقام پر ہیلی کاپٹر اتارنے کا فیصلہ کیا۔رپورٹس کے مطابق ہنگامی لینڈنگ کامیابی سے مکمل ہوئی اور واقعے میں صدر اسحاق ہرزوگ، فضائی عملے یا دیگر کسی بھی شخص کو کوئی جانی نقصان نہیں پہنچا۔ ابتدائی اطلاعات کے مطابق ہیلی کاپٹر کو معمولی نقصان پہنچا، تاہم احتیاطی معائنے کے لیے اسے سروس سے ہٹا دیا گیا۔
اسرائیلی میڈیا کا کہنا ہے کہ ہنگامی لینڈنگ کے بعد صدر اسحاق ہرزوگ کو متبادل ہیلی کاپٹر فراہم کیا گیا، جس کے ذریعے انہوں نے اپنا سفر دوبارہ شروع کیا اور طے شدہ پروگرام کے مطابق اپنی منزل کی جانب روانہ ہوگئے۔فضائی ماہرین کے مطابق پرندوں کے طیاروں یا ہیلی کاپٹروں سے ٹکرانے کے واقعات، جنہیں "برڈ اسٹرائیک” کہا جاتا ہے، دنیا بھر میں فضائی سفر کے دوران پیش آنے والے عام خطرات میں شمار ہوتے ہیں۔ ایسے حالات میں حفاظتی اصولوں کے مطابق احتیاطی لینڈنگ کو ترجیح دی جاتی ہے تاکہ کسی بھی ممکنہ حادثے سے بچا جا سکے۔